چینایی کارگران در نزدیکی مرز تاجیکستان و افغانستان کار ساخت یک جاده بزرگ را که به دلیل نگرانیهای امنیتی برای چند ماه متوقف شده بود، دوباره آغاز کردهاند.
وزارت ترانسپورت تاجیکستان اعلام کرده است که کار ساخت بخش ۱۰۹ کیلومتری بزرگراه «دوشنبه–کولما» که در نزدیکی مرز افغانستان قرار دارد، پس از یک وقفه دوباره از سر گرفته شده است.
به گفته این وزارت، تاجیکستان به چین اطمینان داده است که تدابیر ویژهای برای تأمین امنیت کارگران چینی اتخاذ خواهد شد.
کار این پروژه در اواخر سال ۲۰۲۵ پس از آن متوقف شد که چین به دلیل تهدیدهای امنیتی به شهروندان خود توصیه کرد از مناطق مرزی خارج شوند. این تصمیم در اواخر نوامبر ۲۰۲۵ و پس از حمله به یک گروه کاری چینی گرفته شد که در نتیجه آن دو کارگر چینی کشته شدند. در یک رویداد جداگانه نیز سه شهروند دیگر چین جان باختند.
مقامات تاجیک مسئولیت هر دو حمله را به گروههای مسلح مستقر در افغانستان نسبت دادهاند، اما تاکنون هیچ شواهد مستقلی برای این ادعا ارائه نکردهاند.
بر اساس گزارش بخش تاجیکستان رادیو آزادی، در حال حاضر امنیت کارگران چینی توسط نیروهای ویژه تاجیکستان تأمین میشود.
همچنین وزارت دفاع تاجیکستان اعلام کرده است که قرار است در ماه سپتامبر سال جاری میلادی، نیروهای مرزی چین و نیروهای امنیتی تاجیکستان تمرینهای نظامی مشترک انجام دهند.
نویسنده:سعید سمیر
