کابل کې ځایي سرچینې وایي چې د ملګرو ملتونو د ښځینه کارکوونکو له ډلې فرشته عمادي، د پنجشنبې د غبرګولي ۱۴ مه په کابل کې د ناپېژنده کسانو له خوا وژل شوې ده.
د ځایي سرچینو د ورکړل شوو معلوماتو له مخې، دا پېښه په کابل ښار کې رامنځته شوې، خو تر اوسه د پېښې د څرنګوالي او احتمالي انګېزې په اړه نور جزئیات نه دي خپاره شوي.
سرچینې زیاتوي چې لا هم دا نه ده معلومه چې د دې وژنې عاملان نیول شوي دي او که نه، او دا هم روښانه نه ده چې د څېړنو بهیر په کوم پړاو کې دی.
د طالبانو چارواکو تر اوسه د فرشتې عمادي د وژل کېدو په اړه کوم غبرګون نه دی ښودلی او په دې اړه رسمي څرګندونې هم نه دي خپرې شوي.
د موجودو معلوماتو د محدودیت له امله، د دې پېښې اصلي لامل او انګېزه لا هم معلومه نه ده، او تمه کېږي چې د رسمي معلوماتو په خپرېدو سره به د دې پېښې نور جزئیات روښانه شي.
لیکواله:سلیمه آریایي
