د افغانستان د مقاومت ملي جبهې اعلان وکړ چې د دې جبهې ځواکونو د یکشنبې په ماښام، د زمري ۴مه، د بدخشان ولایت په کران او منجان ولسوالۍ کې د طالبانو پر یوې پوستې برید کړی دی. د دې جبهې په وینا، د برید په ترڅ کې یو طالب وژل شوی او دوه نور ټپیان شوي دي.
هم مهاله، سیمه ییزو سرچینو هم په کران او منجان ولسوالۍ کې د طالبانو پر مواضعو د برید پخلی کړی دی. له دې سره سره، د خپلواکو سرچینو لخوا د دې پېښې د ابعادو په اړه نور جزییات نه دي خپاره شوي.
د مقاومت ملي جبهې د دوشنبې په ورځ د یوې خبرپاڼې په خپرولو سره وویل چې دا عملیات د شپې شاوخوا ۱ بجه د کران او منجان ولسوالۍ اړوند د شهران منجان په سیمه کې ترسره شوي دي.
د دې خبر تر خپرېدو پورې، د طالبانو سیمه ییزو مسوولینو د دې برید او د ملي مقاومت جبهې لخوا د ادعا شویو تلفاتو په اړه څه نه دي ویلي او عکس العمل یې نه دی ښودلی.
دا پېښه په داسې حال کې رامنځته کېږي چې په وروستیو ورځو کې په بدخشان ولایت کې د طالبانو د مخالفو ډلو پوځي تحرکات زیات شوي دي. تر دې وړاندې، د افغانستان د ازادۍ جبهې هم په زېباک ولسوالۍ کې د خپلو ځواکونو د پرمختګ، د طالبانو د ډرون الوتکو د نسکورولو او د دې ډلې د څو پوستو د نیولو خبر ورکړی و. په مقابل کې، طالبانو اعلان کړی چې د مخالفو ځواکونو بریدونه یې په شا تمبولي او د هغوی د پرمختګ مخه یې نیولې ده.
لیکواله:سلیمه آریایي
