د افغانستان د بشري حقونو لپاره د ملګرو ملتونو ځانګړي راپور ورکوونکي، ریچارډ بېنیټ، په هرات ولایت کې د سولهییزو لاریونوالو پر وړاندې د طالبانو د ځواک کارولو او تاوتریخوالي په اړه اندېښنه ښودلې ده.
بېنېټ په یوه تازه بيان کې ویلي چې د روان وضعیت د ارامولو لپاره باید هڅې زیاتې شي او د خلکو، په ځانګړې توګه د ښځو او نجونو د نظر څرګندولو او بیان ازادۍ ته درناوی وشي. هغه ټینګار کړی چې د تاوتریخوالي دوام کولای شي وضعیت لا پسې ترینګلی کړي او زیانونه یې زیات کړي.
نوموړي همداراز ویلي چې هغه کسان چې د لاریونوالو پر وړاندې د زور زیاتي او تاوتریخوالي په پېښو کې لاس لري، باید د خپلو کړنو په اړه ځواب ویونکي وګرځول شي او حساب ترې واخیستل شي.
په وروستیو کلونو کې په افغانستان کې د ښځو او نجونو پر حقونو د محدودیتونو له امله په بېلابېلو ولایتونو کې وخت ناوخت مدني اعتراضونه او لاریونونه شوي دي. نړیوالو بنسټونو تل غوښتنه کړې چې د دغو اعتراضونو د ځپلو پر ځای دې ستونزې د خبرو او سولهییزو لارو له لارې هوارې شي.
الیکوال:سعید سمیر
