د افغانستان د پخواني جمهوري نظام لوړپوړي پوځي جنرال سمېع سادات ویلي، چې په افغانستان کې یوازې د تېرو درېیو میاشتو پر مهال د ۱۸۴ پخوانیو امنیتي او دفاعي ځواکونو د غړو د وژل کېدو پېښې مستندې شوې دي.
سادات پر اېکس ټولنیزې شبکې لیکلي، چې ډېری قربانیان تر وژل کېدو وړاندې له سختې شکنجې سره هم مخ شوي وو. د هغه په وینا، دا هغه پخواني سرتېري دي چې د طالبانو له واکمنېدو وروسته وژل شوي دي.
نوموړي زیاته کړې، چې له ایران او ترکیې څخه افغانستان ته د پخوانیو سرتېرو جبري ستنول د هغوی پر ژوند د ګواښ کچه لا لوړه کړې ده.
سمېع سادات ویلي، د هر قرباني نوم او د هر جرم اسناد به خوندي وساتل شي او د عدالت غوښتنې هڅې به دوام ولري. هغه ټینګار کړی چې د قتل، شکنجې او نورو سرغړونو عاملان باید د قانون پر وړاندې ځواب ویونکي وګرځي.
طالبانو تر اوسه د سمېع سادات دغو څرګندونو ته غبرګون نه دی ښودلی، خو تر دې وړاندې یې ورته تورونه رد کړي دي.
د بښنې نړیوال سازمان هم په خپل د ۲۰۲۵م کال راپور کې په افغانستان کې د بشري حقونو د وضعیت په اړه د شکنجې، له قانون پرته وژنو او د عادلانه محاکمو د نشتوالي په اړه اندېښنه څرګنده کړې وه.
لیکوال:سعید سمیر
