د پاکستان په خیبر پښتونخوا ایالت کې پر یوه امنیتي پوسته د یوه ځانمرګي برید له امله لږ تر لږه ۱۴ تنه، چې د پوځ ۹ سرتېري، ۴ پولیس او د ځنګلونو ادارې ۱ کارمند پهکې شامل دي، وژل شوي او ۲۴ نور ټپیان دي.
د امنیتي سرچینو په وینا، دا برید د پنجشنبې په ماښام، د زمري په لومړۍ نېټه هغه مهال رامنځته شو چې یوه ځانمرګي بریدګر د چاودېدونکو توکو ډک موټر ته د امنیتي پوستې ترڅنګ چاودنه ورکړه.
د دغې چاودنې په پایله کې د پوځ ۲۰ سرتېري او ۴ پولیس ټپیان شوي او د درملنې لپاره نږدې روغتونونو ته لېږدول شوي دي. د یو شمېر ټپیانو روغتیايي حالت د اندېښنې وړ ښودل شوی دی.
امنیتي سرچینو اعلان کړی چې د چاودنې زور امنیتي پوسته په بشپړ ډول ویجاړه کړې ده. همدا راز د خاورو لاندې څخه د قربانیانو د بهر ایستلو لپاره د لټون او ژغورنې عملیات دوام لري او امکان لري ۳ سرتېري لا هم تر خاورو لاندې بند وي.
له دغې حملې وروسته د پاکستان امنیتي ځواکونو د پېښې شاوخوا سیمو کې د تصفیې عملیات پیل کړل. د امنیتي چارواکو په وینا، د دغو عملیاتو پر مهال ۳ وسلهوال بریدګر وژل شوي دي.
تر اوسه کومې ډلې د دغې حملې مسئولیت پر غاړه نه دی اخیستی. پاکستاني چارواکو ویلي چې د عاملینو د پېژندلو او د پېښې د جزئیاتو د څېړلو په موخه څېړنې روانې دي.
د پاکستان په شمال لوېدیځ کې خیبر پښتونخوا ایالت په وروستیو میاشتو کې د وسلهوالو ډلو د بریدونو د زیاتوالي، په ځانګړي ډول د افغانستان پولې ته نږدې سیمو کې شاهد و؛ هغه بریدونه چې هر ځل یې امنیتي ځواکونه او ملکیان په نښه کړي دي.
لیکواله:سلیمه آریایي
