د طالبانو د عدلیې وزارت اعلان وکړ چې په کابل ښار کې د «کستومایز او رستم حیدري» په نوم د یوه ښارګوټي ۲۵ جریبه ځمکه د اختصاصي «امارتي» محکمې د شرعي حکم پر بنسټ امارتي تثبیت شوې ده.
دغه وزارت (شنبې، د زمري ۳مه)د یوې اعلامیې په خپرولو سره ویلي چې د دغه ښارګوټي ځمکې د کابل ښار په څلورمه او اوولسمه ناحیه کې موقعیت لري.
د طالبانو د عدلیې وزارت ویلي چې «د ځمکو د غصب مخنیوي او د غصب شویو ځمکو د بېرته راګرځولو کمېسیون» د دغه ښارګوټي اسناد او مدارک څېړلي او موندلې یې ده چې دا ځمکه دمخه استملاک شوې او د کابل په ښاروالۍ کې د دولت په نوم ثبت ده.
طالبانو د بېلابېلو ښارګوټو - په ځانګړي ډول د هغو ښارګوټو چې د جمهوریت د دوو لسیزو نظام پر مهال ودان شوي - د ملکیت د اسنادو د څېړلو بهیر پیل کړی دی.
د طالبانو د عدلیې وزارت په تېرو څلورو کلونو کې په کابل، بلخ، هرات، ننګرهار، غزني او د افغانستان په یو شمېر نورو ښارونو کې ډېری ښارګوټي «امارتي» یا دولتي اعلان کړي دي. په ټولو نویو موډلونو کې، شاوخوا ۱۰ ورځې وړاندې هم د کابل ښار په اوولسمه ناحیه کې د «غیبي بابا» ښارګوټي ۵۳۲ جریبه ځمکه «امارتي» اعلان شوې وه.
لیکواله:سلیمه آریایي
