د بدخشان ولایت سیمهییزې سرچینې وايي چې طالبانو د شکي او نسي ولسوالیو د خپل سیمهییز قوماندان جمعهخان فاتح پورې اړوندو وسلهوالو کسانو ته امر کړی چې ژر تر ژره خپلې وسلې وسپاري. د دغو سرچینو په وینا، دا اقدام د جمعهخان فاتح او د طالبانو د لوړپوړو چارواکو ترمنځ له څو اوونیو تاوتریخوالي او اختلافاتو وروسته شوی او نوموړی هم په همدې موده کې کابل ته وربلل شوی دی.
د شکي او نسي ولسوالۍ د بدخشان ولایت په درواز سیمه کې موقعیت لري، او جمعهخان فاتح هم د همدې سیمې اوسېدونکی دی. په دغو ولسوالیو کې وروستي اختلافات په تېرو اوونیو کې د بدخشان له مهمو امنیتي تحولاتو څخه بلل شوي او لا هم د طالبانو د چارواکو د پاملرنې په مرکز کې دي.
د اختلافاتو په لوړه کچه کې، جمعهخان فاتح ادعا کړې وه چې زرګونه وسلهوال کسان تر خپلې قوماندې لاندې لري. د هغه نږدې کسان هم وايي چې شاوخوا ۳۵۰۰ جنګیالي په نسي ولسوالۍ کې د هغه تر امر لاندې فعالیت کوي او د هغه یو شمېر نور ځواکونه هم په شکي ولسوالۍ کې ځای پر ځای دي.
باوري سرچینې اټکل کوي چې د جمعهخان فاتح له ځواکونو څخه د راټولېدونکو وسلو شمېر ښايي له ۵۰۰۰ میل څخه زیات شي. خو تر اوسه طالبانو په دې اړه کوم رسمي شمېر نه دی خپور کړی.
په همدې حال کې، راپورونه ښيي چې طالبانو په بدخشان کې د وضعیت د کنټرول لپاره په تېرو اوونیو کې ځانګړي ځواکونه او استخباراتي قطعات دې ولایت ته استولي دي. د سرچینو په وینا، د طالبانو یوه استخباراتي قطعه چې شاوخوا ۱۰۰ موټر لري، په دې عملیاتو کې حضور لري.
ځینې سرچینې احتمال ښيي چې د دغو اقداماتو یوه برخه ښايي د جمعهخان فاتح د احتمالي نیولو لپاره ترسره شوي وي، خو طالبانو تر اوسه دا موضوع په رسمي ډول نه ده تایید کړې او نه یې رد کړې ده.
سرچینې وايي چې اختلافات هغه مهال زیات شول چې جمعهخان فاتح او د هغه تر قوماندې لاندې ځواکونو د طالبانو د لوړپوړو چارواکو د ځینو امرونو له عملي کولو ډډه وکړه. له هغې وروسته د طالبانو د پوځ لوی درستیز فصیحالدین فطرت په منځګړیتوب د کړکېچ د کمولو لپاره خبرې پیل شوې، او په پای کې جمعهخان فاتح له بدخشان څخه کابل ته ولاړ.
د دغو بدلونونو په دوام کې، طالبانو د بدخشان د امنیتي او اداري جوړښت په برخه کې هم بدلونونه راوستي دي. د راپورونو له مخې، د نسي ولسوالۍ ولسوال او امنیه قوماندان له دندو لرې کړل شوي او پر ځای یې نوي کسان ټاکل شوي دي. همدارنګه د جرم ولسوالۍ لپاره هم نوی قوماندان ټاکل شوی دی.
سیمهییزې سرچینې ټینګار کوي چې په نسي او شکي ولسوالیو کې وضعیت لا هم د طالبانو تر سختې څارنې لاندې دی او پر جمعهخان فاتح پورې له اړوندو ځواکونو څخه د وسلو د راټولولو بهیر لا هم روان دی.
لیکواله:سلیمه آریایي
