طالبانو په بادغیس ولایت کې د محصلانو ترمنځ د دې ډلې د مشر هبتالله اخوندزاده د فرمانونو د حفظ سیالي ترسره کړې، چې د طالبانو د والي د دفتر په وینا، ۹۴ محصلان یې ګټونکي اعلان شوي دي.
په بادغیس کې د طالبانو د والي رسنیز دفتر د یکشنبې په ورځ، د لړم پر درېیمه ویلي، چې د دغې سیالۍ د پایلو د اعلان په مراسمو کې د طالبانو والي محمد ولي جان رحمت هم ګډون کړی و.
هبتالله اخوندزاده په تېرو کلونو کې د ښځو او نجونو د زدهکړو، کار او په ټولنیز ژوند کې د ګډون په اړه ګڼ فرمانونه او محدودیتونه صادر کړي دي.
په دغو پرېکړو کې له شپږم ټولګي پورته د نجونو د زدهکړو بندیز، په پوهنتونونو کې د ښځو د زدهکړو ځنډول، په نادولتي بنسټونو کې د ښځو پر کار محدودیتونه او په طبي انستیتوتونو کې د ښځو د زدهکړو درول شامل دي.
همدارنګه، د طالبانو لهخوا په ۱۴۰۳ کال کې د امر بالمعروف او نهی عن المنکر قانون تصویب شو، چې د ښځو پر جامو، غږ او ټولنیزو فعالیتونو یې محدودیتونه وضع کړي دي.
طالبانو تر دې وړاندې هم په ښوونځیو او لېسو کې د «امارت پېژندنې» په نوم د یوه کتاب د حفظ او زدهکړې سیالۍ ترسره کړې وې، چې د راپورونو له مخې، په بېلابېلو ولایتونو کې یې بریالیو ګډونوالو ته جایزې ورکړل شوې دي.
لیکوال:سعید سمیر
