د امریکا د آریزونا ایالت سیمهییزو چارواکو ویلي چې د توسان ښار کې د ډزو په پایله کې لږ تر لږه ۱۰ کسان ټپیان شوي دي. د پولیسو په وینا، شکمن کس هم د ټپیانو په ډله کې دی او د پېښې په اړه څېړنې روانې دي.
د توسان پولیسو ویلي چې دا ډزې د یکشنبې په سهار شاوخوا دوه بجې د سیمې پر وخت هغه مهال وشوې، چې د ښار په مرکز کې یوه سوداګریز مرکز ته نږدې په یوه ګڼه سیمه کې ګڼ شمېر خلک راټول شوي وو. د ګزمې پولیس د ډزو د غږ له اورېدو وروسته سمدستي د پېښې ځای ته رسېدلي.
د پولیسو په وینا، افسران د پېښې په ځای کې له شکمن کس سره مخامخ شوي، خو هغه د پولیسو امرونو ته غاړه نه ده ایښې. له همدې امله، یوه پولیس افسر پر شکمن کس ډزې کړي. پولیسو ویلي چې شکمن کس له سختو ټپونو سره روغتون ته لېږدول شوی دی.
پولیسو زیاته کړې چې نور ۹ ټپیان د پولیسو تر رسېدو مخکې په ډزو لګېدلي وو. د راپورونو له مخې، ټول ټپیان لویان دي او په دې پېښه کې هېڅ پولیس افسر ته زیان نه دی اوښتی.
د شکمن کس هویت او د دې ډزو انګېزه تر اوسه نه ده څرګنده شوې. خو یوې سیمهییزې ټلوېزیوني شبکې د پولیسو د سرچینو په حواله راپور ورکړی چې دا پېښه د دوو هغو ډلو ترمنځ د شخړې له امله رامنځته شوې چې یو بل یې پېژندل. د ډزو له امله یو شمېر هغه کسان هم ټپیان شوي چې له دې شخړې سره یې هېڅ تړاو نه درلود.
د «د وسلو د تاوتریخوالي آرشیف» د شمېرو له مخې، د روان میلادي کال له پیل راهیسې په امریکا کې لږ تر لږه ۲۵۷ ډلهییزې د ډزو پېښې ثبت شوي دي. دغه بنسټ هغه پېښې ډلهییزې ډزې ګڼي چې پکې لږ تر لږه څلور کسان ټپیان یا وژل شوي وي.
لیکواله:سلیمه آریایي
