د طالبانو مخالفې ډلې، مقاومت جبهې ادعا کړې چې د هرات ولایت د فارسي ولسوالۍ په «آنتن پوسته» نومې امنیتي پوستې باندې یې برید کړی، چې له امله یې یو طالب جنګیالی وژل شوی او درې نور ټپیان شوي دي.
د جبهې په خپره شوې خبرپاڼه کې راغلي، دغه برید تېره شپه شاوخوا لس بجې ترسره شوی او د دوی ځواکونو د طالبانو څلور میله وسلې هم ترلاسه کړې دي.
ځايي سرچینو د فارسي ولسوالۍ په یاده سیمه کې د شپې د برید او نښتې رامنځته کېدل تایید کړي، خو ویلي یې دي چې د مقاومت جبهې ځواکونو هڅه کړې وه پوسته ونیسي، خو په بشپړ ډول یې په نیولو نه دي بریالي شوي.
طالبانو تر اوسه د دغې حملې او ادعا شویو مرګژوبلو په اړه څه نه دي ویلي، او د مقاومت جبهې ادعاوې هم په خپلواکه توګه نه دي تایید شوي.
دا په داسې حال کې ده چې په وروستیو دوو اوونیو کې د طالبانو د مخالفو وسلهوالو ډلو بریدونه، په ځانګړي ډول په بدخشان او یو شمېر نورو ولایتونو کې، زیات شوي دي.
د طالبانو ویاند ذبیحالله مجاهد د بدخشان د وروستیو نښتو راپورونه «رسنیز تبلیغات» بللي او ویلي یې دي چې هېواد د «فدایانو» په قربانیو ازاد شوی او د ساتنې لپاره به یې لا ډېرې قربانۍ ورکړل شي.
بلخوا، د افغانستان پخواني کورنیو چارو وزیر علي احمد جلالي وروستي امنیتي پرمختګونه د طالبانو د سیاستونو پر وړاندې د خلکو د تدریجي غبرګون نښه بللی، خو زیاتوي چې د طالبانو د مخالفو ډلو اوسني پراکنده بریدونه لا هم د طالبانو واکمنۍ ته جدي ګواښ نه ګڼل کېږي.
لیکوال:سعید سمیر
