په داسې حال کې چې د امريکا او د ايران د اسلامي جمهوريت ترمنځ د تفاهمليک په متن کې لږ تر لږه درې ځله د لبنان نوم ياد شوی او د دغه هېواد پر حاکميت او ځمکنۍ بشپړتيا ټينګار شوی، د اسرائيلو نوم د دې سند په هېڅ ماده کې نه دی ذکر شوی.
د دې هوکړې د مادو له مخې، امريکا او د ايران اسلامي جمهوريت د لبنان د راتلونکي په اړه ځانګړي تعهدات منلي دي. د تفاهمليک په لومړۍ ماده کې راغلي چې دواړه لوري ژمنه کوي چې د لبنان په جبهه کې به پوځي عمليات سمدستي او دايمي بند کړي او د دغه هېواد د حاکميت او ځمکنۍ بشپړتيا ملاتړ به کوي.
متحده ايالاتو د چهارشنبې په ورځ، د غبرګولي په ۲۷مه، د هغه تفاهمليک رسمي متن خپور کړ چې د تېرې اوونۍ په پای کې يې له اسلامي جمهوريت سره لاسليک کړی و. د دې سند خپرېدل وروسته له هغې وشول چې د هوکړې متن ته د عامه لاسرسي د نشتوالي په اړه پراخې غوښتنې او نيوکې مطرح شوې وې.
دا سند د «د امريکا متحده ايالاتو او د ايران اسلامي جمهوريت ترمنځ د اسلامآباد تفاهمليک» تر سرليک لاندې خپور شوی او رسنيو ته سپارل شوی، څو يې جزئيات د عامه افکارو لپاره روښانه شي.
د اړوندو چارواکو د څرګندونو له مخې، ټاکل شوې ده چې دغه تفاهمليک د جمعې په ورځ په رسمي ډول لاسليک شي. د سند رسمي لاسليک به دواړو لورو ته د ۶۰ ورځو يوه موده برابره کړي، څو خبرې اترې دوام ومومي او د هوکړې وروستي شرايط نهايي شي.
دا سند په داسې حال کې خپرېږي چې د هغه محتوا، په ځانګړي ډول د لبنان او راتلونکو امنيتي ترتيباتو اړوند برخې، د رسنيو او سياسي څارونکو ځانګړې پاملرنه ځان ته رااړولې.
لیکواله:سلیمه آریایي
