د طالبانو د ریاستالوزراء اداري مرستیال عبدالسلام حنفي په مشرۍ د الشفاء روغتون (جمهوریت روغتون) د رهبرۍ پلاوي غونډه شوې، چې په کې د روغتون د ساختماني چارو د چټکتیا، طبي تجهیزاتو د برابرولو او د متخصصو ډاکترانو د ګمارنې په اړه بحث شوی دی.
د طالبانو د حکومت مرستیال ویاند حمدالله فطرت وايي، په غونډه کې د روغتون د ترسره شویو چارو او فعالیتونو راپور وړاندې شو او د ساختماني چارو د پرمختګ او چټکتیا په اړه ارزونه وشوه.
د هغه په وینا، د اکسیجنپلانټ د برابرولو، نصب او فعالولو، همداراز د طبي تجهیزاتو د پېرلو او برابرولو موضوعات هم وڅېړل شول.
فطرت زیاته کړې چې د ډاکترانو او متخصصینو پر استخدام او هغوی ته د روزنیزو فرصتونو د برابرولو په اړه هم هراړخیز بحث شوی دی.
د طالبانو د حکومت د مرستیال ویاند په خبره، د غونډې په پای کې د الشفاء روغتون د چارو د چټکتیا، ژر فعالېدو او ګټې اخیستنې ته د سپارلو لپاره «لازم تصمیم» نیول شوی دی.
لیکوال:سعید سمیر
