احمد سعیدي د یوې طالب سرچینې له قوله ادعا کړې چې د دې ډلې د کابینې غړو، په هغه غونډه کې چې په وروستیو کې په کندهار کې له ملا هبتالله اخوندزاده سره ترسره شوې،له هغه څخه یې د طالبانو د مشرتابه د استعفا غوښتنه کړې ده.
سعیدي، پرته له دې چې د خپلې سرچینې نوم واخلي، ویلي چې د طالبانو د کابینې غړو په دغه غونډه کې د ملا هبتالله له کړنو او د هېواد له اوسني وضعیت څخه نارضایتي څرګنده کړې او درې وړاندیزونه یې ورسره شریک کړي دي.
د دغه سیاسي شنونکي په وینا، وړاندې شوي وړاندیزونه د ملا هبتالله له مشرتابه څخه د استعفا، د نوي رهبر د ټاکلو لپاره د داخلي ټاکنو ترسره کول، او د دې ډلې د اوسني مشرتابه د سیاستونو بیا کتنه شامل دي.
سعیدي همدارنګه ادعا کړې چې د طالبانو د کابینې غړو د دې ډلې مشر ته ویلي چې پر خلکو سختګيري او له نړیوالې ټولنې سره تقابل د طالبانو د واکمنۍ د دوام په ګټه نه دی او کولی شي د دې ډلې د حکومت راتلونکي ته منفي پایلې ولري.
د هغه په وینا، ملا هبتالله د دې غوښتنو په ځواب کې د کابینې له غړو غوښتي چې د وروستۍ پرېکړې د اعلان او ځواب لپاره ورته وخت ورکړي.
دا ادعا په داسې حال کې مطرح کېږي چې ځینو رسنیو مخکې د خپلو سرچینو له قوله راپور ورکړی و چې د کندهار په وروستۍ غونډه کې د طالبانو د کابینې غړو د دې ډلې د مشر د امرونو اطاعت ته ټینګار کړی او د هغه د فرمانونو ملاتړ یې کړی دی.
د هغو راپورونو له مخې، ملا هبتالله په دغه غونډه کې د خپلو امرونو پر تطبیق ټینګار کړی او د طالبانو له چارواکو یې غوښتي چې د “امر بالمعروف” پالیسۍ په لا جدي ډول عملي کړي.
په تېرو کلونو کې هم د طالبانو د مشر او د دې ډلې د ځینو داخلي ډلو، په ځانګړي ډول د حقاني شبکې ترمنځ د اختلافاتو په اړه ګڼ راپورونه خپاره شوي دي. خو د طالبانو چارواکو تل د داخلي اختلافاتو شتون رد کړی دی.
ځینې راپورونه دا هم ښيي چې د طالبانو یو شمېر چارواکي د دې ډلې د مشرتابه له نیوکو وروسته له محدودیتونو یا فشارونو سره مخ شوي او ځینې یې له هېواده وتلي دي.
په ورته وخت کې، د طالبانو د داخلي اختلافاتو د راپورونو تر خپرېدو سره هم مهاله، د دې ډلې د سیاستونو پر وړاندې د یو شمېر خلکو انتقادونه هم زیات شوي دي. څارونکي وایي چې اقتصادي ستونزې، د بېوزلۍ او بېکارۍ پراختیا، او ټولنیز محدودیتونه په افغانستان کې د عامه نارضایتۍ د زیاتېدو له مهمو عواملو څخه دي.
طالبانو تر اوسه د احمد سعیدي له خوا د مطرح شویو ادعاوو په اړه رسمي غبرګون نه دی ښودلی او دا ادعاوې په خپلواکه توګه نه شي تاییدېدلی.
لیکواله:سلیمه آریایي
