د سیمهییزو سرچینو د معلوماتو له مخې، د بغلان د زاړه ښار په سیمه کې د وسلهوالو غلو په برید کې یو دوکاندار وژل شوی او مېرمن یې ټپي شوې ده. سرچینې وايي، دا پېښه د سې شنبې په ورځ، د زمري شلمه، په دغه ښار کې رامنځته شوې ده.
د سرچینو په وینا، پېښه د سې شنبې په ورځ شاوخوا د ماسپښین ۲ بجو شاوخوا رامنځته شوې ده. وسلهوالو بریدګرو د دې کورنۍ کور ته له ننوتلو وروسته پر سمېعالله، چې دوکاندار و، ډزې کړي او هغه یې وژلی دی.
سرچینې زیاتوي چې د سمېعالله مېرمن هم د دغه برید پر مهال ټپي شوې ده. تر اوسه د نوموړې روغتیايي وضعیت په دقیقه توګه نه دی معلوم او د ټپونو د کچې په اړه هم نور معلومات نه دي خپاره شوي.
د سرچینو په وینا، بریدګرو له دوکاندار سره له ډزو او وژلو وروسته د کورنۍ نغدې پیسې او سره زر له ځان سره وړي دي. هغوی له غلا وروسته له سیمې تښتېدلي دي.
تر اوسه د بریدګرو د هویت، د دې برید د انګېزې او د هغوی د تېښتې د څرنګوالي په اړه نور معلومات نه دي خپاره شوي. همداراز، مسوولو چارواکو تر اوسه د دې پېښې او د عاملانو د پېژندنې په اړه څه نه دي ویلي.
لیکواله:سلیمه آریایي
