د بدخشان ولایت د یفتل پایین ولسوالۍ کې پر اعتراض کوونکو د ډزو له امله د وژل شویو کسانو شمېر څلورو ته رسېدلی دی. همدارنګه د دې پېښې له امله اته کسان، د یوې ښځې په ګډون، ټپیان شوي دي.
دا اعتراضونه وروسته له هغې پیل شول چې د سیمې خلکو ادعا وکړه، د طالبانو ځواکونو د یوې ښځې بدني تلاشي کړې ده. د نښتو پر مهال د طالبانو یو غړی هم وژل شوی او یو بل یې ټپي شوی دی.
د عیني شاهدانو په وینا، د څلورو وژل شویو جسدونه او اته ټپیان د شنبې ماښام د بدخشان ولایت د فیضآباد ښار ولایتي روغتون ته ولېږدول شوي. وروسته د یکشنبې په ورځ، د زمري ۱۱مه، د وژل شویو جسدونه بېرته یفتل پایین ولسوالۍ ته، خاورو ته سپارلو لپاره انتقال شول.
اعتراضونه د شنبې ورځې، د زمري ۱۰مې، له غرمې وروسته هغه مهال پیل شول چې یو شمېر اوسېدونکو ادعا وکړه، د طالبانو ځواکونو د سنګآب سیمې په امنیتي پوستې کې د یوې ښځې بدني تلاشي کړې ده. دغه موضوع د خلکو له غبرګون سره مخ شوه او اعتراضي غونډه جوړه شوه.
د سیمهییزو راپورونو له مخې، طالبانو د اعتراض کوونکو د خپرولو لپاره ډزې وکړې. د سیمې اوسېدونکي هم وایي، له خلکو سره د طالبانو د ځواکونو د چلند په اړه نارضایتي د دغو اعتراضونو له اصلي لاملونو څخه وه.
له سیمې څخه په خپرو شویو ویډیوګانو کې د ډزو غږونه اورېدل کېږي او یو شمېر خلک د ټپیانو د لېږد پر مهال لیدل کېږي.
بل لور ته، د بدخشان د طالبانو د پولیسو د قوماندانۍ ویاند د پېښې د پیل په اړه بل روایت وړاندې کړی دی. د هغه په وینا، د طالبانو ځواکونه پر یوه موټرسایکل سپاره یو سړي او یوې ښځې باندې د نشهیي توکو د لېږد په تور شکمن شول او غوښتل یې د هغوی ورسره توکي وپلټي.
هغه ادعا کړې چې یاد سړی له سیمې وتښتېد او وروسته یې ادعا وکړه چې له هغه سره ملګرې ښځه بدني تلاشي شوې ده. د هغه په خبره، له دې وروسته یو شمېر اوسېدونکو پر امنیتي پوستې برید وکړ او د پېښې په ترڅ کې څو کسانو ته مرګژوبله واوښته.
د بدخشان د طالبانو د پولیسو د قوماندانۍ ویاند د دې ډلې د ځواکونو د ډزو او د وژل شویو او ټپیانو د کره شمېر په اړه څه نه دي ویلي. هغه همدارنګه ځینې کسان د دې پېښې په پارولو تورن کړي دي.
دې پېښې پراخ غبرګونونه هم راپارولي دي. د طالبانو یوه قوماندان صلاحالدین سالار په دې پېښه کې د ملکي وګړو وژل کېدل تایید کړي او دا یې خواشینوونکې بللې ده.
همدارنګه د صلاحالدین رباني په مشرۍ د افغانستان اسلامي جمعیت د اعتراض کوونکو ځپل غندلي او طالبان یې د ښاریانو د حقونو په نقض، د خلکو د کلتور او دودونو ته په بېاحترامۍ او د زورزیاتي په کارولو تورن کړي دي.
د سپاهیان میهن جبهې هم پر اعتراض کوونکو ډزې غندلي او دا یې یو غیرانساني اقدام بللی دی.
لیکواله:سلیمه آریایي
