د «شعر شپه» ګډ علمي او فرهنګي پروګرام د ښځو آنلاین پوهنتون په همکارۍ او د کرج د اسلامي آزاد پوهنتون په کوربتوب د سېشنبې په ورځ، د چنګاښ ۳۰مه، په حضوري او هممهاله آنلاین بڼه ترسره شو. په دې پروګرام کې د افغانستان، ایران، پاکستان او هند یو شمېر استادانو، څېړونکو، شاعرانو او لیکوالانو ګډون کړی و.
ګډونوالو په دې ناسته کې د فارسي ژبې او ادب د مقام، د فرهنګي هویت په ساتنه کې د هغې د رول او د سیمې د هېوادونو ترمنځ د علمي او فرهنګي همکاریو د پراختیا پر اهمیت خبرې او نظرونه شریک کړل. همدارنګه د فرهنګي اړیکو د پیاوړتیا او د پوهنتوني تعاملاتو د پراختیا پر اړتیا ټینګار وشو.
د پروګرام په دوام کې یو شمېر شاعرانو او لیکوالانو خپلې نوې شاعرۍ او ادبي آثار په فارسي او پښتو ژبو ولوستل. د مراسمو دا برخه د ګډونوالو له تود هرکلي سره مخ شوه او د غونډې فضا یې د قلموالو ترمنځ په یوه ګډ ادبي او فرهنګي محفل بدله کړه.
تنظیموونکو وویل چې د دې پروګرام موخه د علمي او فرهنګي اړیکو پیاوړتیا، د پوهنتونیانو او ادیبانو ترمنځ د ادبي خبرو اترو لپاره د زمینې برابرول او په سیمهییزه کچه د فرهنګي همکاریو پراخول دي.
د مراسمو په پای کې د کرج اسلامي آزاد پوهنتون د ستاینلیک په ورکولو سره له یو شمېر شاعرانو، لیکوالانو او هغو محصلانو څخه قدرداني وکړه چې د دې پروګرام په ترسره کولو کې یې ونډه اخیستې وه.
لیکواله:سلیمه آریایي
