د افغانستان د ترکمنانو د راتلونکي د ارزونې په موخه دوه ورځنۍ غونډه د ترکیې په کاپادوکیا کې د افغانستان د ترکمنو ټولنې د یو شمېر محصلینو، ښځو، مدني ټولنې د غړو او ترکمنو پوهنتوني استادانو په ګډون ترسره شوه. په دې غونډه کې تر ۲۰۵۰ کال پورې د دې ټولنې د راتلونکي لپاره علمي او عملي لیدلوري او حللارې وڅېړل شوې.
دغه غونډه د وږي په شپږمه او اوومه ترسره شوه. ګډونوالو په ترڅ کې د افغانستان د ترکمنانو لپاره د علمي، ښوونیزو او مدني پروګرامونو پر پیاوړتیا ټینګار وکړ. همداراز، په افغانستان کې دننه او بهر د دغو پروګرامونو پر پراختیا، په ځانګړي ډول د ځوان نسل د ظرفیتونو پر کارولو، ټینګار وشو.
د غونډې ویناوالو، د ځوانانو روزنه او د هغوی فعاله ونډه اخیستل د افغانستان د ترکمنانو د راتلونکي په جوړولو کې مهم عوامل وبلل. هغوی د ځوان نسل د علمي او ټولنیزې ودې لپاره د مناسبو زمینهوو برابرول او په مدني فعالیتونو کې د هغوی د ونډې زیاتول مهم وبلل.
دغه غونډه د افغانستان د ترکمن ځوانانو سازمان او د متحد ترکستان د سفیرانو ټولنې په نوښت جوړه شوې وه او د ترکیې جمهوریت د ترکانو د کلتور نړیوالې ټولنې هم د دې غونډې په جوړولو کې همکاري کړې ده.
لیکواله:سلیمه آریایي
