د ایران اسلامي جمهوریت سفارت په کابل کې اعلان کړی چې د دغه هېواد سفیر، علیرضا بېکدلي، د کابل ښار د مرادخاني تاریخي سیمې او د ابوالفضل زیارت څخه لیدنه کړې ده. دا خبر د سفارت په ایکس پاڼه کې خپور شوی، خو د دې لیدنې د هدف، پایلو او یا هم احتمالي پروګرامونو په اړه نور جزئیات نه دي ورکړل شوي.
مرادخاني سیمه د کابل ښار له لرغونو او تاریخي برخو څخه ګڼل کېږي، چې په تېرو کلونو کې پکې د ښاري بیارغونې ځینې پروژې هم عملي شوي دي. دا سیمه د خپل تاریخي او فرهنګي جوړښت له امله ځانګړی اهمیت لري.
د ابوالفضل زیارت هم د افغانستان د پلازمېنې کابل له پېژندل شویو مذهبي ځایونو څخه دی، چې خلک د زیارت او نذر ادا کولو لپاره ورته ورځي.
د ایران سفارت تر اوسه د دې لیدنې او موخو په اړه نور معلومات نه دي خپاره کړي.
لیکواله:سلیمه آریایي
