ځایي سرچینو راپور ورکړی چې فرید نصرت، چې د طالبانو د کورنیو چارو وزارت یو کارکوونکی وو، په کابل کې وژل شوی دی. د دې سرچینو په وینا، د دې پېښې عاملان طالبان بلل شوي او د دې قتل لامل “مذهبي تبعیض” ښودل شوی دی.
د سرچینو په وینا، دا پېښه د سې شنبې په ورځ، د سهار تر ۱۰ بجو پورې، د طالبانو د کورنیو چارو وزارت په یوه برخه کې پېښه شوې ده. د پېښې د څرنګوالي په اړه نور جزئیات نه دي خپاره شوي.
ځایي سرچینو ادعا کړې چې په دې پېښه کې مذهبي او قومي اختلافات او حساسیتونه رول لري. د دوی په وینا، فرید نصرت د اسماعیليې مذهب پیرو و.
د ورکړل شویو معلوماتو پربنسټ، فرید نصرت د بدخشان ولایت د شغنان ولسوالۍ اصلي اوسېدونکی و او د طالبانو د کورنیو چارو وزارت کې یې د کارکوونکي په توګه فعالیت کاوه.
په دې حال کې، د ۸صبح ورځپاڼې راپور ورکړی چې دا یې په خپلواکه توګه نه شي تاییدولی چې د دې پېښې دقیق لامل او مطرح شوې انګیزې څه دي.
دغه پېښه په داسې حال کې راپور شوې چې مخکې تر دې د روادارۍ سازمان په یوه راپور کې، چې په «افغانستان کې د شیعه اسماعیلیانو د بشري حقونو وضعیت» په نوم خپور شوی و، د دې مذهبي اقلیت د حقونو د نقض او تبعیض په اړه یې خبر ورکړی و.
لیکواله:سلیمه آریایي
