د طالبانو د دفاع وزارت سرمفتش، مفتي لطیفالله حکیمي، د دې ډلې د مخالفو وسلهوالو جبهو وروستیو فعالیتونو ته په اشاره ویلي، چې د روانو «اغتشاشونو» مخه باید ونیول شي او یا دې «اصلاح» کړل شي.
حکیمي د پنجشنبې په ورځ، د زمري په ۲۲مه، د طبي علومو اکاډمۍ د طب پوهنځي د فراغت په مراسمو کې ویلي، چې په افغانستان کې یې د مخالفانو د وروستیو فعالیتونو په اړه ناسته کړې ده.
هغه زیاته کړې: «نن مو یو مجلس وکړ، امارت باید دې وړو وړو اغتشاشونو ته اجازه ور نه کړي، په هر ډول چې وي. یا یې باید خنثی کړي او یا یې باید اصلاح کړي.»
د هغه د څرګندونو له مخې، د طالبانو مشرتابه باید د مخالفو ډلو او وسلهوالو فعالیتونو ته اجازه ور نه کړي.
که څه هم حکیمي په مشخص ډول د کومې جبهې یا ډلې نوم نه دی اخیستی، خو د هغه څرګندونې داسې مهال کېږي چې په بدخشان کې د طالبانو د ناراضي قوماندان جمعهخان فاتح او د دې ډلې د ځواکونو ترمنځ نښتې روانې دي. د جمعهخان فاتح په اړه مخکې هم د طالبانو له مرکزي مشرتابه سره د اختلافونو راپورونه خپاره شوي وو.
په همدې حال کې، په وروستیو ورځو کې د طالبانو د مخالفو وسلهوالو جبهو د فعالیتونو او بریدونو راپورونه هم خپاره شوي دي؛ له همدې امله د دفاع وزارت د سرمفتش د «وړو وړو اغتشاشونو» یادونه د طالبانو پر وړاندې د وروستیو امنیتي ننګونو په تړاو بلل کېږي.
لیکوال:سعید سمیر
