د پاکستان په پلازمېنه، اسلام اباد کې د پیمس روغتون د ښځینه او ولادي ناروغانو په څانګه کې د اورلګېدنې له امله ۱۴ نوي زېږېدلي ماشومان مړه شوي دي. دا پېښه د چهارشنبې په ورځ، د وږي ۴مه، په دغه روغتون کې رامنځته شوې ده.
د خپرو شویو معلوماتو له مخې، د اورلګېدنې پر مهال د روغتون د ښځینه او ولادي ناروغانو په څانګه کې ۱۵ نوي زېږېدلي ماشومان موجود وو. د روغتون کارکوونکي یوازې وتوانېدل چې یو ماشوم له سیمې څخه وباسي او وژغوري.
د دې پېښې په تړاو، د پاکستان لومړي وزیر شهباز شریف د اورلګېدنې د علت او په پېښه کې د ښکېلو عواملو د معلومولو لپاره د سمدستي څېړنو د پیل امر کړی دی.
د پاکستان لومړي وزیر اړوندو چارواکو ته هم سپارښتنه کړې چې که په دې پېښه کې د هر شخص یا ادارې غفلت یا مسؤولیت ثابت شي، نو پر هغوی دې لازم او جدي قانوني اقدامات ترسره شي.
اړوند چارواکي د پېښې د جزیاتو او د اورلګېدنې د علت په اړه څېړنې کوي. د دغو څېړنو پایلې به د پېښې د څرنګوالي او په دې تړاو د احتمالي مسؤولیتونو په اړه نور معلومات وړاندې کړي.
لیکواله:سلیمه آریایي
