د نیپال او چین پر ګډه پوله د واورې، ډبرو او خټو د ښوېدنې له امله سخت سېلابونه راوتلي چې لږ تر لږه ۹۵ کسان یې وژلي او ۳۴۱ نور کسان لا درکه دي.
رویټرز د چهارشنبې په ورځ راپور ورکړی چې د ډبرو او خټو ستره څپه «لنډه خوله» سیند ته لوېدلې او د نیپال پر لور یې ویجاړوونکي سېلابونه رامنځته کړي دي.
تایید شوې ویډیوګانې ښيي چې د پولې په سیمه کې لسګونه کسان د اوبو، خټو او ډبرو له زورورې څپې سره بهېدلي دي. چارواکو د مرګژوبلې د لا زیاتېدو او پراخو مالي زیانونو اندېښنه څرګنده کړې ده.
د نیپال پولیسو ویلي، ژغورونکو تر اوسه د ۹۵ کسانو مړي موندلي او ۶۵ ټپیان په سیمهییزو روغتیايي مرکزونو او د دغه هېواد په پلازمېنه کاتماندو کې تر درملنې لاندې دي.
د نیپال د ګرځندوی وزارت په وینا، لږ تر لږه ۳۴۱ بهرني سیلانیان او غرختونکي هم په اغېزمنه سیمه کې لادرکه دي. په ورکو کسانو کې له ۱۰۰ ډېر هندي اتباع، درې امریکایان او ۱۲ بریټانویان شامل دي.
د چارواکو په وینا، لسګونه ځايي اوسېدونکي هم لا نه دي موندل شوي او د ژغورنې عملیات دوام لري.
لیکوال:سعید سمیر
