په افغانستان کې د ترافیکي پېښو د زیاتوالي له امله، یوازې په تېره یوه اوونۍ کې لږ تر لږه ۲۶ کسان مړه شوي او ۸۶ نور ټپیان شوي دي. دغه شمېرې د ۹ ترافیکي پېښو دي چې د چنګاښ له ۱۵مې تر ۲۱مې نېټې پورې د هېواد په اتو ولایتونو کې رامنځته شوي دي.
د ثبت شویو پېښو څېړنه ښيي چې زابل، سمنګان، هلمند، ننګرهار، پنجشېر، نورستان، فاریاب او غزني ولایتونه په دې موده کې د خونړیو ترافیکي پېښو شاهدان وو. ډېری دغه پېښې د هېواد پر اصلي لویو لارو او ګڼې ګوڼې لرونکو مسیرونو کې رامنځته شوي دي.
په وروستۍ پېښه کې، د یکشنبې په ورځ د غزني ولایت د ګیلان ولسوالۍ په سیمه کې یو ۵۸۰ ډوله مسافر وړونکی موټر چپه شو. د دې پېښې له امله ۳ کسان مړه او ۲۶ نور ټپیان شوي.
د زابل ولایت په شاهجوی ولسوالۍ کې هم د کابل–کندهار پر لویه لار د یوه مسافر وړونکي موټر د چپه کېدو له امله یو کس مړ او ۲۸ نور ټپیان شوي. د راپورونو له مخې، د ټپیانو په ډله کې ښځې او ماشومان هم شامل دي.
په سمنګان ولایت کې بیا د کابل–مزارشریف پر لاره د یوه ۵۸۰ ډوله مسافر وړونکي موټر او باروړونکي موټر ترمنځ ټکر شوی چې په پایله کې یې یوه کس ژوند له لاسه ورکړی او ۹ نور ټپیان شوي.
همدارنګه په هلمند، ننګرهار، پنجشېر، نورستان او فاریاب ولایتونو کې په بېلابېلو پېښو کې یو شمېر کسان مړه او ټپیان شوي دي. په یوه پېښه کې د فاریاب ولایت امنیتي ځواکونو د یوه موټر له پلټنې وروسته ۱۹ څاروي چې ویل کېږي غلا شوي وو، کشف کړي او موټر چلوونکی یې نیولی دی.
په وروستیو میاشتو کې د ترافیکي پېښو زیاتوالي د افغانستان د سړکونو د خوندیتوب په اړه اندېښنې زیاتې کړي دي. شمېرې ښيي چې د روان لمریز کال له پیل راهیسې تر اوسه د هېواد په بېلابېلو ولایتونو کې له ۱۰۰ څخه ډېرې ترافیکي پېښې ثبت شوي دي چې له امله یې لسګونه کسان مړه او سلګونه نور ټپیان شوي دي.
کارپوهان لوړ سرعت، د موټر چلوونکو بېاحتیاطي، د وسایطو زړښت او د ځینو لویو لارو خراب وضعیت د ترافیکي پېښو د زیاتوالي مهم عوامل بولي. د کابل–هرات، کابل–جلالآباد، کابل–کندهار او کابل–مزارشریف لویې لارې لا هم له هغو مسیرونو څخه دي چې تر ټولو ډېرې ترافیکي پېښې پکې ثبت شوي دي.
لیکواله:سلیمه آریایي
