په ننګرهار کې د پاکستاني زدهکړیالانو مشر محمد نعمان ویلي، چې د پاکستان حکومت او طالب چارواکو د شنبې په ورځ د ۶۸ پاکستاني طبي محصلینو لومړۍ ډلې ته اجازه ورکړه، څو د تورخم له لارې افغانستان ته داخل او خپلې طبي زدهکړې بېرته پیل کړي.
د نوموړي په وینا، دا پرېکړه د پاکستاني محصلینو له پرلهپسې غوښتنو او اپیلونو وروسته شوې ده. هغه زیاته کړه، چې د جمعې په ماښام د ۶۸ محصلینو نوملړ په جلالاباد کې د پاکستان قونسل جنرال، شفقات الله، ته سپارل شوی و او هغه یې د پاکستان د بهرنیو چارو وزارت ته استولی و.
محمد نعمان وایي، د پاکستان د لومړي وزیر مرستیال او د بهرنیو چارو وزیر اسحاق ډار د دغه غوښتنلیک له ترلاسه کولو وروسته د محصلینو د ستونزې د حل لپاره بېړنۍ همکاري کړې ده. د هغه په خبره، په کابل کې د پاکستان سفیر عبیدالرحمن نظاماني هم د دغه بهیر په اسانه کولو کې مهم رول لوبولی دی.
د ترلاسه شویو معلوماتو له مخې، دا مهال د ننګرهار ولایت په بېلابېلو پوهنتونونو او لوړو زدهکړو مؤسسو کې، د قبایلي سیمو او د پښتونخوا د بېلابېلو برخو څخه راغلي له زرو څخه ډېر پاکستاني محصلین په زدهکړو بوخت دي.
دا پرمختګ داسې مهال رامنځته کېږي چې د تورخم دروازه له تېرو لسو میاشتو راهیسې د عادي تګ راتګ پر مخ تړلې ده او یوازې افغان کډوالو ته د اوښتو اجازه ورکول کېږي.
لیکوال:سعید سمیر
