په ختیځ فلاندر، بلجیم کې هغه ساختماني کارګرانو چې د یوه کور په بیارغونه بوخت وو، د نوو فاضلابي نلونو د نصبولو لپاره د کیندنې پر مهال په تصادفي ډول یوه پټه خزانه وموندله چې د سرو زرو له شمشونو او سکو څخه جوړه وه. د دې خزانې اټکلي ارزښت شاوخوا ۹ میلیونه یورو اټکل شوی دی.
دغه کشف د اوونۍ په پیل کې هغه مهال وشو چې کارګرانو د ودانۍ پر بنسټ کار کاوه. په کارګرانو کې یو ۱۸ کلن ځوان، کوبي، هم شامل و چې د اوړي د رخصتیو پر مهال یې د لنډمهاله کار لپاره دنده ترسره کوله. هغه د بلجیم له دولتي ټلویزیوني شبکې سره په خبرو کې وویل چې د دوی لومړنی غبرګون «بې باوري او حیرانتیا» وه.
کوبي وویل، په لومړي سر کې یې فکر کاوه چې موندل شوې سکې د یو یورو سکې دي؛ خو کله چې یې د سرو زرو یوه خامه ټوټه ولیده، پوه شول چې له ډېر ارزښتناک شي سره مخ دي. کارګرانو لږ وروسته پولیس له دې کشف څخه خبر کړل او سیمهییزو چارواکو د دې خزانې د سرچینې او مالکیت په اړه څېړنې پیل کړې.
ماریو، د ودانۍ د بیارغونې د پروژې مدیر، وویل چې د موندل شوو سکو او شمشونو شمېر دومره زیات دی چې د هغوی ساتل د دوی لپاره عملاً ناشوني دي. هغه ټینګار وکړ چې د داسې خزانې پټول ښايي د غلا په توګه وبلل شي. کوبي هم وویل چې د سرو زرو د شاوخوا ۹ میلیونه یورو ارزښت ته په کتو، د داسې کشف پټ ساتل ډېر ستونزمن دي.
دغه ملکیت اوس مهال د دندرموند ښار د ټولنیزو او رفاهي خدمتونو له یوې ادارې سره تړاو لري. د دغې ادارې مدیر، ګیرت هیلارت، وویل چې د هغه لومړنی غبرګون هم حیرانتیا وه. نوموړي هیله څرګنده کړه چې که خزانه د دې ادارې ملکیت وګرځي، له هغې څخه ترلاسه کېدونکي منابع به د خیریه فعالیتونو د ملاتړ او د خلکو د مخ پر زیاتېدونکو اړتیاوو د پوره کولو لپاره وکارول شي.
سیمهییزو پولیسو له دې کشف وروسته د سیمې بشپړه پلټنه وکړه او سره زر یې یوه خوندي ځای ته ولېږدول. پولیسو له خلکو هم وغوښتل چې د احتمالي نورو خزانو د لټون لپاره د ساختماني کار ساحې ته مراجعه ونه کړي. پولیسو ویلي چې په دغه ځای کې اړینې پلټنې ترسره شوي دي.
اوس تر ټولو مهمه پوښتنه دا ده چې د دې خزانې اصلي مالک څوک دی. د بلجیم د قوانینو له مخې، د پټې شوې خزانې اصلي مالک پنځه کاله وخت لري چې د هغې د بېرته ترلاسه کولو لپاره اقدام وکړي. خو سیمهییز څارنوال، چې څېړنې یې پیل کړي دي، وايي لا هم معلومه نه ده چې دا سره زر د چا وو او ولې په دغه ځای کې پټ کړل شوي وو.
که په دې موده کې د خزانې مالک پیدا نه شي، د بلجیم مدني قوانین د داسې کشف لپاره ځانګړي شرایط لري. که خزانه د بل کس په ملکیت کې وموندل شي، د قانوني شرایطو د پوره کېدو په صورت کې یې ارزښت د هغه کس او د ملکیت د مالک ترمنځ وېشل کېدای شي چې خزانه یې موندلې ده.
خو د دغو مقرراتو عملي کېدل په دې پورې تړلي دي چې معلومه شي خزانه له کوم جرمي فعالیت سره تړاو نه لري. له همدې امله، مخکې له دې چې د مالکیت یا د سرو زرو د راتلونکي په اړه کومه پرېکړه وشي، د قضايي چارواکو له خوا د دې خزانې د سرچینې په اړه څېړنې به دوام ولري.
اوس مهال، کارګران او د ملکیت مالک باید ۱۸۲۳ ورځې انتظار وباسي، څو معلومه شي چې ایا کوم شخص یا کسان به د شاوخوا ۹ میلیونه یورو په ارزښت د دې خزانې د ترلاسه کولو لپاره ادعا وکړي او که نه. تر هغه وخته به د دې خزانې برخلیک لا هم له ډېرو پوښتنو او ناڅرګندتیاوو سره مخ وي.
لیکواله:سلیمه آریایي
