دوه افغان او درې ترکي وګړي په صربستان کې د انسانتښتوونکو له منګولو آزاد شول؛ درې شکمن کسان نیول شوي.
د صربستان د کورنیو چارو وزارت اعلان کړی چې دوه افغان او درې ترکي وګړي، چې په بلګراد ښار کې تښتول شوي وو، د پولیسو په عملیاتو کې آزاد شوي دي. د دې پېښې په تړاو درې کسان د انسانتښتونې په تور نیول شوي دي.
د صربستان د کورنیو چارو وزارت د معلوماتو له مخې، دغه پنځه بهرني وګړي د اګست په ۲۶مه په بلګراد کې د «ګاورېلا پرینسیپا» په کوڅه کې تښتول شوي وو. شکمنو کسانو د هغوی د خوشې کولو په بدل کې د ۳۰ زره یورو غوښتنه کړې وه.
د صربستان د کورنیو چارو وزارت ویلي چې تښتول شوي کسان د «ولادیمیرتسي» سیمې یوه کلیوالي کور ته له انتقالېدو وروسته له فزیکي او رواني ځورونې سره مخ شوي وو. پولیسو د عملیاتو په ترڅ کې هغوی آزاد کړل.
د دې قضیې په تړاو درې کسان نیول شوي چې دوه یې د صربستان او یو یې د بوسنیا او هرزګوینا اتباع دي. صربستاني چارواکو ویلي چې د ټولو دریو شکمنو کسانو لپاره تر ۴۸ ساعتونو پورې لنډمهاله توقیف ټاکل شوی او هغوی به د تورونو له دوسیې سره څارنوالۍ ته معرفي شي.
دا عملیات د بلګراد د عالي عمومي څارنوالۍ په امر او د صربستان د پولیسو د بېلابېلو واحدونو په ګډون ترسره شوي دي. د دغه هېواد چارواکو تر اوسه د آزاد شوو پنځو وګړو د هویت او اوسني وضعیت په اړه نور جزئیات نه دي خپاره کړي.
تر هغې چې د محکمې وروستی حکم صادر شوی نه وي، نیول شوي کسان یوازې د انسانتښتونې په قضیه کې شکمن بلل کېږي، او د هغوی د مجرمیت یا بېګناهۍ د ټاکلو مسؤلیت د صربستان پر قضايي ادارو دی.
لیکواله:سلیمه آریایي
