په بدخشان کې ځايي سرچينې وايي، چې د طالبانو د استخباراتو ځواکونو د دغه ولايت په شکي ولسوالۍ کې د جمهوري نظام يو پخوانی پوځي نيولی دی. د سرچينو په وينا، دغه پخوانی پوځي د بدخشان د طالبانو له ناراضي چارواکو څخه د جمعهخان فاتح له پلويانو څخه و.
سرچينو د جمعې په ورځ، د زمري په ۲۳مه، وويل چې د طالبانو د استخباراتو ځواکونو دغه پخوانی پوځي د پنجشنبې په ورځ له يو شمېر نورو د شکي ولسوالۍ له اوسېدونکو سره يوځای نيولی او نامعلوم ځای ته يې انتقال کړی دی. تر اوسه د نيول شويو کسانو د برخليک په اړه نور جزیات نه دي خپاره شوي.
د سرچينو د معلوماتو له مخې، دغه پخوانی پوځي چې جليل نومېږي، په وروستيو مياشتو کې د شکي ولسوالۍ د قطقطي د سرو زرو په کان کې کار کاوه. هغه ته نږدې سرچينې وايي چې جليل مخکې اعلان کړی و، که جګړه رامنځته شي، نو د ۱۵۰ کسیزې ډلې په جوړولو سره به د جمعهخان فاتح ملاتړ وکړي.
د سرچينو په وينا، يو شمېر ځايي مخورو د جليل له نيول کېدو وروسته د طالبانو د ولسوال دفتر ته ورغلي او د هغه د خوشې کېدو غوښتنه يې کړې ده. خو طالبانو تر اوسه دغه پخوانی پوځي نه دی خوشې کړی او د هغه د نيول کېدو د لامل په اړه يې هم څه نه دي ويلي.
سرچينې زياتوي چې جليل د جمهوري نظام له سقوط مخکې په کابل کې د امنيتي حوزو له ډلې په يوه حوزه کې د امنيت د آمر په توګه دنده ترسره کړې وه او په څو نورو پوځي بستونو کې يې هم کار کړی و.
د ترلاسه شويو راپورونو له مخې، دغه پخوانی پوځي شاوخوا يو کال مخکې له ايران څخه افغانستان ته راستون شوی و او له بېرته راستنېدو وروسته يې د شکي ولسوالۍ د قطقطي د سرو زرو په کان کې کار پيل کړی و.
د درواز ولسواليو يو شمېر اوسېدونکي وايي، چې طالبانو په وروستيو اوونيو کې د پخوانيو نظاميانو او هغو کسانو د نيولو لړۍ زياته کړې ده چې له جمعهخان فاتح سره نږدې بلل کېږي. ځايي سرچينې په بدخشان کې د دغو نيونو د دوام خبر ورکوي.
دا نيونه په داسې حال کې شوې چې د بدخشان په ځينو سيمو کې د جمعهخان فاتح د اړوندو کسانو او طالب ځواکونو ترمنځ نښتې زياتې شوي دي. خو د وروستۍ نيونې او روانو جګړو ترمنځ د مستقيمې اړيکې په اړه تر اوسه کوم خپلواک معلومات نه دي خپاره شوي.
لیکواله:سلیمه آریایي
