د ۲۰۲۶ د شکنجې نړیوال راپور په افغانستان کې د تېرو څلورو کلونو په ترڅ کې د ښځینه بندیانو د پام وړ زیاتوالي خبر ورکړی او په دغه هېواد کې د بشري حقونو د وضعیت د خرابېدو په اړه یې خبرداری ورکړی دی.
د راپور له مخې، په افغانستان کې د ښځینه بندیانو شمېر په ۲۰۲۱ کال کې له ۸۴۰ تنو څخه په ۲۰۲۵ کال کې ۱،۸۲۵ تنو ته رسېدلی دی. دا شمېر ښيي چې د دې مودې په ترڅ کې د ښځینه بندیانو شمېر له دوه برابره زیات شوی دی.
د شکنجې پر ضد نړیوال سازمان د دې راپور په خپرولو سره ویلي چې د افغانستان ښځې او نجونې لا هم په پراخو او سیستماتیکو محدودیتونو کې د زدهکړې، کار، د تګ راتګ آزادۍ او په ټولنیز او عامه ژوند کې د ګډون په برخو کې له ستونزو سره مخ دي.
په راپور کې همدارنګه د بندیانو د وضعیت، په زندانونو کې د هغوی د ساتنې شرایطو او عادلانه محاکمې ته د محدود لاسرسي په اړه اندېښنه څرګنده شوې ده. دغه بنسټ ټینګار کړی چې د داسې وضعیت دوام د بشري بنسټیزو حقونو جدي نقض ګڼل کېږي.
د شکنجې پر ضد نړیوال سازمان له نړیوالې ټولنې او نړیوالو بنسټونو غوښتي چې د مؤثرو اقداماتو په ترسره کولو سره په افغانستان کې د بشري حقونو د وضعیت د ښه والي او د ښځو او بندیانو د حقونو د ملاتړ لپاره اقدام وکړي.
دا راپور په داسې حال کې خپرېږي چې د بشري حقونو بنسټونو په وروستیو کلونو کې څو ځله په افغانستان کې د ښځو او نجونو پر وړاندې د محدودیتونو د زیاتېدو او د هغو د اساسي آزادۍ او انساني کرامت پر اغېزو اندېښنه څرګنده کړې ده.
لیکواله:سلیمه آریایي
