نوراحمد اسلامجار، د طالبانو والي په هرات کې، وایي چې په وروستیو میاشتو کې په دغه ولایت کې د دوی د ډلې د مطلوب لباس د رعایت کچه د پام وړ کمه شوې ده. هغه ادعا کړې چې دا موضوع په هرات کې د وروستیو اقداماتو له لاملونو څخه یوه ده.
اسلامجار د طالبانو له رسمي رسنۍ «الاماره» خبري اژانس سره په خبرو کې، په هرات کې د یو شمېر ښځو نیول د هغه څه په چوکاټ کې یاد کړي چې نوموړي«د خدای او رسول امر» بللی، او ویلي یې دي چې دا اقدامات د حجاب اړوند لارښوونو د تطبیق لپاره ترسره شوي دي. هغه همدارنګه ځینې ښځې په دې تورنې کړي چې د ګاونډیو هېوادونو د مهاجرت پر مهال د «غیر افغاني کلتور» تر اغېز لاندې راغلي دي.
د طالبانو والي ویلي چې د ښځو د پوښښ موضوع له اوږدو څېړنو وروسته او د هغه څه پر بنسټ چې هغه یې «جدي اړتیا» بولي، عملي شوې ده. هغه زیاته کړې چې «شرعي حجاب» د هرات په دود کې برقع ده او د هغه په وینا، په وروستیو کلونو کې د چادري یا ورته پوښاک کارول عام شوي دي.
د هغه په باور، ځینې ښځې هڅه کوي چې د ده په وینا «د هرات کلتوري، دیني او تاریخي څېره» بدله کړي.
اسلامجار په دوام کې ادعا کړې چې د ښځو د نیولو بهیر د ښځینه مامورینو له خوا ترسره کېږي او نارینه ځواکونه پکې دخالت نه لري. خو دا په داسې حال کې ده چې په ټولنیزو شبکو کې خپاره شوي عکسونه او ویډیوګانې د ښځو نیول د نارینه مامورینو له خوا هم ښيي، هغه موضوع چې مخکې یې غبرګونونه راپارولي وو.
هغه دغه انځورونه «جعلي او د مصنوعي ځیرکتیا جوړ شوي» بللي او ټینګار یې کړی چې هېڅ یوه نیول شوې ښځه په زندان کې نه ساتل کېږي.
د طالبانو د والي په وینا، ځینې ښځې د «سپارښتنې او تنبیه» وروسته او د کورنیو د تضمین په بدل کې خوشې شوي او خپلو کورونو ته ستنې شوې دي. هغه پرته له دې چې د دغو کسانو د ساتنې ځای په اړه جزئیات ورکړي، ویلي چې دا ښځې په خوندي ځایونو کې «سپارښتنه او اصلاح» شوې دي.
لیکواله:سلیمه آریایي
