په امریکا کې د افغان کډوالو د ملاتړ سازمان «افغان ایواک» خبرداری ورکړی، چې د ډونالډ ټرمپ حکومت ښايي له منځمهالو ټاکنو یوه اونۍ وروسته د یو شمېر افغان کډوالو د نیولو او افغانستان ته د لېږدولو پلان عملي کړي.
د دغه سازمان مشر شان وندایور له امریکایي کانګرسه غوښتي، چې د «افغانانو د موقت خوندیتوب» لایحه تصویب کړي، څو د ۲۰۲۹ کال تر جولای میاشتې پورې د افغان کډوالو د ایستلو مخه ونیول شي.
د افغان ایواک په هغه اعلامیه کې چې د جمعې په ورځ خپره شوې، ویل شوي چې د امریکا حکومت غواړي یو شمېر افغان کډوال په الوتکو کې افغانستان ته ولېږدوي او طالبانو ته یې وسپاري.
د وندایور په وینا، د دې پلان د پلي کېدو لپاره له ټاکنو یوه اونۍ وروسته وخت په پام کې نیول شوی، ځکه په هغه وخت کې به د خلکو پام تر ډېره د ټاکنو له پایلو او اړوندو خبرونو سره بوخت وي.
نوموړي زیاته کړې، چې د پلان له مخې ښايي ځینې افغان کډوال هغه مهال ونیول شي، چې په خپله خوښه د ځینو اداري چارو د ترسره کولو لپاره د کډوالو ادارې ته ورځي.
دغه سازمان په افغانستان کې د بشري حقونو وضعیت ته هم اندېښنه ښودلې او ویلي یې دي، چې د طالبانو تر واکمنۍ لاندې ښځې او نجونې له محدودیتونو سره مخ دي، پخواني پوځیان او دولتي کارکوونکي له شکنجې او وژنو سره مخامخ شوي او د امریکایي ځواکونو د افغان همکارانو کورنۍ هم تر تعقیب او ځورونې لاندې دي.
د افغان ایواک مشر له کانګرسه غوښتي، چې د افغان کډوالو د خوندیتوب لپاره ژر تر ژره اقدام وکړي.
تر اوسه امریکایي چارواکو د افغان ایواک د دغو ادعاوو او د افغان کډوالو د احتمالي ایستلو د پلان په اړه څه نه دي ویلي.
لیکوال:سعید سمیر
