د کابل په لوېدیځ کې سیمهییزې سرچینې وايي، چې د دشت برچي سلګونه اوسېدونکي له لږ تر لږه درېیو ورځو راهیسې د مسمومیت له نښو سره مخ شوي او د درملنې لپاره یې سیمهییزو روغتونونو ته مراجعه کړې ده. د سرچینو په وینا، د ناروغانو ترمنځ د سر درد، نس ناستې او کانګې له ډلې د مسمومیت نښې لیدل شوي دي.
سیمهییزې سرچینې زیاتوي چې د مسموم شویو کسانو د پام وړ شمېر ماشومان جوړوي. تر اوسه د دغو مسمومیتونو کره لامل نه دی معلوم، خو د سیمې یو شمېر اوسېدونکي وايي چې د دوی د کورنیو غړي په خپلو کورونو کې د ټانکر له اوبو له استفادې وروسته د مسمومیت له نښو سره مخ شوي دي.
د کابل لوېدیځ یوه اوسېدونکي له خصوصي فردا نیوز شبکې سره په خبرو کې ویلي، چې د هغه د کورنۍ ټول غړي، د مېرمنې او پنځو اولادونو په ګډون، مسموم شوي او یوازې دی له دغو نښو سره نه دی مخ شوی. نوموړي د دې پېښې د احتمالي لامل په اړه نور معلومات نه دي ورکړي.
د کابل لوېدیځ په یوه سیمهییز روغتون کې یوه ډاکټر هم ویلي، چې لومړنیو معایناتو په یو شمېر ناروغانو کې د مسمومیت نښې تایید کړي دي. د دغه ډاکټر په وینا، ډېری مراجعه کوونکي ناروغان د کابل له لوېدیځې قلعهنو سیمې څخه وو.
دغه ډاکټر زیاته کړې چې د لومړنیو معایناتو پایلو په ډېرو مواردو کې د ناروغانو په بدن کې د امیبي پرازیتونو شتون ښودلی دی. خو لا څرګنده نه ده چې ایا د اوبو ککړتیا او که کوم بل عامل د دغو مسمومیتونو په رامنځته کېدو کې رول لري. د اصلي لامل د معلومولو لپاره لا زیاتو څېړنو ته اړتیا ده.
د طالبانو ادارې تر اوسه د کابل په لوېدیځ کې د سلګونو کسانو د مسمومیت د راپورونو په اړه څه نه دي ویلي. همداراز، د ناروغانو د کره شمېر او د هغوی د روغتیايي وضعیت په اړه رسمي معلومات هم نه دي خپاره شوي.
د کابل لوېدیځ د پلازمېنې له هغو سیمو څخه دی چې د څښاک اوبو ته د لاسرسي په برخه کې له جدي ستونزو سره مخ دی. د دې سیمې په بېلابېلو برخو کې د اوبو د څاهګانو وچېدو له امله یو شمېر کورنۍ د خپلو اوبو اړتیاوو د پوره کولو لپاره پر ګرځنده ټانکرونو متکي شوې دي.
لیکواله:سلیمه آریایي
