علیرضا بېکدلي، د ایران اسلامي جمهوریت سفیر په کابل کې، وايي چې د ایران او د طالبانو د ادارې ترمنځ اړیکې د «رغنده» مسیر په لور روانې دي او دا بهیر کولی شي د دوهاړخیزو او سیمهییزو همکاریو د پیاوړتیا لامل شي. هغه دا څرګندونې په کابل کې د پنځم نړیوال نندارتون د پرانیستې په مراسمو کې وکړې.
هغه ټینګار وکړ چې ایران د افغانستان د خصوصي سکتور له هغې هڅې ملاتړ کوي چې د اقتصادي خپلواکۍ، پرمختګ او د عامه هوساینې په لور روانې دي، او دا تګلاره د دغه هېواد د اقتصادي ثبات د پیاوړتیا لپاره مهمه بولي.
د هغه په وینا، د اقتصاد محوره تګلاره کولی شي د دواړو هېوادونو ترمنځ د دوامدارو اړیکو بنسټ کېږدي، او په همدې چوکاټ کې د افغانستان د امنیت ټینګښت او له ګاونډیو هېوادونو سره د اړیکو پراختیا هم تعقیبېږي.
سفیر زیاته کړه چې د رېل پټلۍ، سړکونو، بندونو په څېر زیربناوو پراختیا او همدارنګه د صنعت او کرنې ودې ته پراختیا ورکولی شي د افغانستان د اقتصادي پرمختګ لپاره مهم رول ولوبوي.
علیرضا بېکدلي همدارنګه د دواړو هېوادونو له سوداګرو او پانګوالو وغوښتل چې د رامنځته شوې «دوستانه او ورورولۍ» فضا څخه ګټه واخلي او د ایران او افغانستان ترمنځ د سوداګرۍ او اقتصادي اړیکو کچه لوړه کړي.
لیکواله:سلیمه آریایي
