په بدخشان کې د طالبانو د ځواکونو او جمعهخان فاتح ترمنځ نښته.
د طالبانو د ځواکونو او د طالبانو د ناراضي قوماندان جمعهخان فاتح د پلویانو ترمنځ د سېشنبې په ماښام د بدخشان ولایت د نسي ولسوالۍ په مربوطاتو کې نښته شوې ده. د راپورونو له مخې، دغه نښته د یادې ولسوالۍ په شاخدره او خوغز سیمو کې رامنځته شوې، چې د فاتح اړوند کسان په دغو سیمو کې حضور لري.
په یوه غږیز فایل کې چې د چهارشنبې په ورځ، د زمري ۲۱مه، له نسي ولسوالۍ څخه رسنیو ته رسېدلی، د فاتح له یوه پلوي څخه د نښتې د پیل په اړه پوښتنه کېږي. فاتح په ځواب کې وايي: «فعلاً جګړه روانه ده. ملګرو ته ووایاست، که کومه برنامه لري، پیل یې کړي.»
هغه په یوه بل غږیز فایل کې هم پر وسلهوال اقدام د پیل ټینګار کوي او وايي: «سلامونه مې ټولو خلکو ته ورسوئ. خلک دې پیل وکړي. نور څه کوي، که یې نه پیلوي؟» دغه څرګندونې داسې مهال خپرېږي چې د نوموړي له لوري د ورکړل شوو امرونو په اړه نور جزئیات نه دي په ډاګه شوي.
په یوه جلا ویډیو کې چې له همدې درې څخه افغانستان انټرنشنل ته رسېدلې، د ډزو غږونه اورېدل کېږي. خو د نښتې د شدت، احتمالي مرګژوبلې او اوښتو زیانونو په اړه تر اوسه خپلواک معلومات نه دي خپاره شوي.
تر اوسه د دې نښتې د پیل کره علت په خپلواک ډول نه دی تایید شوی. ځینو سرچینو ویلي چې د طالبانو ځواکونه د وسلو د راټولولو لپاره شاخدرې او خوغز سیمو ته تللي وو، چې له هغې وروسته د دواړو لورو ترمنځ نښته رامنځته شوه.
د دې راپور تر خپرېدو پورې، طالبانو او جمعهخان فاتح په رسمي او خپلواک ډول د نښتې د علت، احتمالي مرګژوبلې او د نسي ولسوالۍ د اوسني وضعیت په اړه جزئیات نه دي وړاندې کړي.
لیکواله:سلیمه آریایي
