د پښتونخوا ملي عوامي ګوند مشر محمود خان اڅکزي د پاکستان حکومت «ترهګر حکومت» بللی او ادعا یې کړې چې دغه حکومت د پوځي ادارو په ملاتړ او د پیسو او زور له لارې واک ته رسېدلی دی. نوموړي همدارنګه د خیبر پښتونخوا د اعلی وزیر سهیل اپرېدي د هغه دریځ ملاتړ کړی چې د ده په وینا، د ظلم پر وړاندې یې نیولی دی.
اڅکزي دغه څرګندونې د پاکستان د پارلمان په غونډه کې وکړې. په دې غونډه کې په خیبر پښتونخوا کې د بېړني حالت د نافذولو پرېکړه تر بحث او تصویب لاندې وه. هغه ادعا وکړه چې د خلکو انتخاباتي اراده کمزورې شوې او د پارلمان څوکۍ په پیسو ترلاسه شوې دي؛ له همدې امله، اوسنی حکومت د خلکو د واقعي غوښتنو استازیتوب نه کوي.
د پښتونخوا ملي عوامي ګوند مشر همدارنګه وویل چې تحریک انصاف ګوند ته اجازه ورنه کړل شوه چې په ټاکنو کې د خپل ګوند له انتخاباتي نښان سره برخه واخلي، نو د دغه ګوند نوماندان اړ شول چې د شاوخوا ۲۰۰ بېلابېلو انتخاباتي نښانونو په کارولو سره ټاکنیزې سیالۍ ته داخل شي.
اڅکزي د حکومت پر وړاندې د سهیل اپرېدي له دریځ څخه دفاع وکړه او ویې ویل چې د خیبر پښتونخوا خلکو د هغه څه پر وړاندې مقاومت ښودلی چې نوموړي ترهګري وبلله. د اڅکزي په وینا، اپرېدي له خلکو غوښتي چې د ظلم پر وړاندې مقاومت وکړي، نه دا چې تاوتریخوالي ته مخه کړي.
اڅکزي خبرداری ورکړ چې د ایالتونو د حقونو پر سر سیاسي اختلافات ښايي له خیبر پښتونخوا څخه نورو سیمو ته هم وغځېږي او د پاکستان نورې برخې هم تر اغېز لاندې راولي. نوموړي همدارنګه پر هغه څه نیوکه وکړه چې ده د «لاهور تخت» وباله او له حکومته یې وغوښتل چې له ایالتونو سره په خپل چلند کې بیاکتنه وکړي.
لیکواله:رویا ستانکزی
