د طالبانو ویاند، ذبیح الله مجاهد، ادعا کړې چې پاکستان پر افغانستان د هوايي بریدونو په ترسره کولو سره هڅه کوي له سعودي عربستان سره د «مکې امنیتي تړون» له مخې له خپلو ژمنو څخه اوږه خالي کړي.
مجاهد د پنجشنبې په ورځ په کندهار کې په یوه دیني مدرسه کې وویل، طالبانو داسې هېڅ اقدام نه دی کړی چې پاکستان ته پر افغانستان د برید لپاره پلمه ورکړي. هغه د پاکستاني چارواکو دا ادعا هم رد کړه چې ګواکي د افغانستان له خاورې څخه د بېپیلوټه الوتکو بریدونه ترسره کېږي.
مجاهد زیاته کړه، که طالبان داسې بریدونه ترسره کړي، نو په ښکاره ډول به یې مسؤولیت ومني او د دغو بریدونو هدفونه به هم مشخص وي.
لیکواله:محبوبه بابري
