یو شمېر ځوانانو په ننګرهار ولایت کې په سیندونو مې د ډوبېدو پېښو د کمولو په موخه د عامه پوهاوي کمپاین پیل کړی دی. دا کمپاین د «تودوخه مو نه وژني، خو سیند مو وژني» تر شعار لاندې د ولایت په بېلابېلو برخو کې روان دی.
د دې کمپاین فعال حبیب امیري رسنیو ته ویلي چې د دې پروګرام اصلي موخه د ځوانانو او ماشومانو د سیندونو د خطرونو په اړه د پوهاوي لوړول او له خطرناکو او تندو اوبو څخه د هغوی د مخنیوي لپاره هڅول دي.
د هغه په وینا، یو شمېر ځوانانو په رضاکارانه ډول په دې کمپاین کې برخه اخلي او د سیندونو په غاړو کې د خبرداري شعارونو په لېږدولو سره خلک په خطرناکو سیمو کې د لامبو وهلو څخه منع کوي.
امیري وایي چې دا اقدام د ننګرهار په سیندونو کې د ځوانانو او ماشومانو د ډوبېدو د پېښو د زیاتوالي له امله پیل شوی دی. هغه زیاتوي چې د تودوخې له زیاتېدو سره د ډوبېدو ګڼ شمېر راپورونه ترلاسه کېږي، چې دې موضوع د خلکو ترمنځ اندېښنې زیاتې کړي دي.
د هغه په خبره، د دې کمپاین هدف یوازې په خطرناکو سیندونو کې د لامبو مخنیوی او د خلکو د پوهاوي لوړول دي. امیري زیاتوي چې ډېرو خلکو دا هڅه ستایلې ده، خو ځینې یې ورسره موافق نه دي.
هغه همدارنګه ویلي چې دا کمپاین هر کال د تودوخې په موسم کې د یو شمېر ځوانانو په همکارۍ ترسره کېږي، خو ځینې وخت د خلکو له بېپامۍ، ملنډو یا د خطر د عادي ګڼلو سره مخ کېږي.
د دې کمپاین غړي د کابل سیند په غاړو، د کونړ او درونټې په سیمو، د ننگرهار کانال او د جلالآباد ښار په ځینو برخو کې حضور لري او له ځوانانو غواړي چې په سیندونو کې له لامبو وهلو ډډه وکړي.
دغه ځوانان له حکومتي مسوولینو هم غوښتنه کړې چې د سیندونو په غاړو کې ګزمې او څارنه زیاته کړي څو د ورته پېښو مخه ونیول شي.
په همدې حال کې، د ننګهار د اطلاعاتو او فرهنګ ریاست اعلان کړی چې یوازې په تېره یوه میاشت کې، ۲۰ ځوانان د دې ولایت په بېلابېلو سیمو کې د لامبو پر مهال د ډوبېدو له امله مړه شوي دي.
د تودوخې له زیاتېدو سره، ډېر ځوانان او تنکي ځوانان د معیاري حوضونو او مناسب تفریحي امکاناتو د نشتوالي له امله د لامبو وهلو لپاره خطرناکو سیندونو او بندونو ته ځي، چې دا ځایونه د مسوولینو له خوا ناامنه او خطرناک بلل شوي دي.
تر دې وړاندې د طبیعي پېښو پر وړاندې د چمتووالي ادارې ویلي وو چې د روان کال په لومړیو دوه نیمو میاشتو کې ۷۵ ماشومان او ځوانان د ډوبېدو له امله خپل ژوند له لاسه ورکړی دی؛ داسې شمېرې چې په اوسط ډول ښيي هره ورځ یو کس د دې پېښو قرباني کېږي.
لیکواله:سلیمه آریایي
