د نیپال چارواکو اعلان کړی چې په دغه هېواد کې د ویجاړونکو سېلابونو له امله د وژل شویو کسانو شمېر ۶۲۶ تنو ته رسېدلی دی. د نیپال د ناورینونو د خطر د کمولو او د بحرانونو د مدیریت د ملي ادارې د تازه شمېرو له مخې، ۲۴۲۶ کسان لا هم ورک دي؛ دا شمېرې ښيي چې د دغه طبیعي ناورین له امله د مړو او ورکو شویو کسانو شمېر د پام وړ زیات شوی دی.
تر دې مخکې د وژل شویو کسانو شمېر ۶۱۶ تنه او د ورکو شویو کسانو شمېر ۱۹۲۴ تنه اعلان شوی و. د دغو شمېرو زیاتوالی په داسې حال کې دی چې په زیانمنو سیمو کې د لټون او ژغورنې عملیات لا هم دوام لري او مرستندویه ځواکونه د ورکو کسانو د موندلو لپاره هڅې کوي.
خو نامناسبه هوا او د لا ډېرو سېلابونو د رامنځته کېدو احتمال د ژغورنې چارې له جدي ستونزو سره مخ کړې دي. د نیپال چارواکي وايي چې تر اوسه له ۴۴۰۰ څخه ډېر کسان له زیانمنو سیمو ژغورل شوي او د نورو کسانو د موندلو هڅې دوام لري.
د ورکو شویو کسانو کورنۍ، چې په کې سلګونه بهرني اتباع هم شامل دي، لا هم د خپلو خپلوانو د برخلیک په اړه د خبر ترلاسه کولو په تمه دي. ځايي چارواکو د زیانمنو سیمو د پراخوالي له امله د ورکو کسانو پېژندنه او موندنه د ژغورنې د عملیاتو له مهمو لومړیتوبونو څخه بللې ده.
دغه ناڅاپي او پراخ سېلاب چې د چهارشنبې له ورځې د نیپال او د چین د تبت په سرحدي سیمه کې پیل شوی، اوس په همالیا سیمه کې د وروستیو کلونو له تر ټولو خونړیو طبیعي پېښو څخه بلل کېږي. د دغه ناورین شدت د سیمې استوګنیزو سیمو او زېربناوو ته پراخ زیانونه اړولي دي.
د لومړنیو راپورونو له مخې، په همالیا سیمه کې د یوه یخچال د یوې برخې نړېدل ښايي د اوبو، یخ، خټو او ډبرو د ستر حجم د خوشې کېدو لامل شوي وي. دغه مواد په ډېر سرعت د لاندې پرتو درو پر لور خوځېدلي او د ویجاړونکي سېلاب د رامنځته کېدو لامل شوي دي؛ خو کارپوهان لا هم د دې پېښې د دقیقو جزیاتو په څېړلو بوخت دي.
سېلاب د بوت کوشي سیند او د سیمې د نورو سیندونو په اوږدو کې خپور شوی او کلي، سړکونه، پلونه، ودانۍ او د برېښنا د تولید تأسیسات یې ویجاړ کړي دي. سپوږمکۍ انځورونو هم په یخچالي سیمو کې د احتمالي نړېدنې احتمال ښودلی، خو د پېښې د اصلي علت د معلومولو لپاره تخصصي څېړنې لا هم روانې دي.
د دغو سېلابونو له امله تر ټولو سخت زیانمنو شویو سیمو څخه یوه د چین او نیپال ترمنځ د ګیرونګ سرحدي دروازه ده. دې سیمې ته اوښتو زیانونو، د ځايي زېربناوو ترڅنګ، د دواړو هېوادونو ترمنځ د تګ راتګ او اړیکو بهیر هم له جدي خنډونو سره مخ کړی دی.
لیکواله:سلیمه آریایي
