پاکستاني چارواکو ویلي چې د دغه هېواد امنیتي ځواکونو د افغانستان د پولې په اوږدو کې د ځمکني او هوايي عملیاتو په دوام کې یې د تحریک طالبان پاکستان ۲۹ غړي وژلي دي.
د الجزیرې د راپور له مخې، د پاکستان د اطلاعاتو وزیر عطاءالله تارړ د دوشنبې په ورځ، د چنګاښ اتمه، ویلي چې دا عملیات د پاکستان په بېلابېلو سیمو کې د وروستیو وسلوالو بریدونو په ځواب کې ترسره شوي دي. د هغه په وینا، د پکتیا، پکتیکا او کونړ ولایتونو درې هدفونه د دقیقو هوايي بریدونو لاندې نیول شوي او له منځه وړل شوي دي.
دا عملیات یوه ورځ وروسته له هغې ترسره شول چې وسلوالو کسانو د پاکستان د رېنجرز پر مرکز په کراچۍ ښار کې برید وکړ، چې په پایله کې یې درې پاکستاني سرتېري ووژل شول. د پاکستان امنیتي چارواکو ویلي چې درې بریدګر یې وژلي او یو بریدګر یې، چې د افغان وکړي په توګه معرفي شوی، نیولی دی. د دې برید مسؤلیت د «جماعت الاحرار» ډلې، چې د پاکستاني طالبانو غورځنګ یوه بېله شوې څانګه ده، منلی دی.
په مقابل کې، طالبانو ویلي چې د پاکستان هوايي بریدونو ملکي سیمې په نښه کړي دي او په پایله کې یې لږ تر لږه ۳۶ ملکي وګړي، چې ښځې او ماشومان هم پکې شامل دي، وژل شوي او ۱۶۳ نور ټپیان شوي دي.
پاکستان وايي چې د دې عملیاتو هدف د پاکستاني طالبانو غورځنګ پټنځایونه او په افغانستان کې دننه خوندي ځایونه وو. د اسلاماباد چارواکي په وروستیو کلونو کې د خپلو امنیتي ځواکونو پر ضد د بریدونو زیاتوالی د پاکستاني طالبانو غورځنګ او د هغوی متحدو ډلو ته منسوبوي.
تر اوسه هېڅ خپلواکې سرچینې د پاکستاني چارواکو او طالبانو له خوا د دې بریدونو په اړه وړاندې شوې ادعاوې په خپلواکه توګه نه دي تایید کړي.
لیکواله:سلیمه آریایي
