«د افغانستان د جمهوریت جبهه» وايي، ځواکونو یې په سرپل ولایت کې د طالبانو اړوند د سکرو څو موټر سوځولي دي.
دې جبهې په فېسبوک کې د یوې خبرپاڼې په خپرولو سره ویلي، چې دا برید (یکشنبې سهار، د وږي ۸مه) د «راه ګردو» په کوتل کې شوی، چې د سرپل ولایت د بلخاب ولسوالۍ او د سمنګان ولایت د درهصوف ولسوالۍ ترمنځ پروت یوه تګراتګ دی.
«د افغانستان د جمهوریت جبهې» ویلي: «په دې عملیاتو کې د سکرو څو هغه موټر چې د افغانستان طبیعي سرچینې یې په ناقانونه توګه لېږدولې، سوځول شوي دي.»
دې جبهې د طالبانو تر کنټرول لاندې د کانونو استخراج د هېواد د «طبیعي سرچینو لوټ» بللی او له خلکو یې غوښتي چې د «ملي شتمنیو د لوټ» پر وړاندې چوپ پاتې نه شي.
«د افغانستان د جمهوریت جبهې» سږ کال خپلې پوځي حملې د طالبانو پر وړاندې پیل کړي دي او ډېری فعالیتونه یې په بامیان ولایت کې متمرکز دي. خو طالبانو تر اوسه د دې جبهې د ادعا شوو بریدونو په اړه څه نه دي ویلي.
لیکواله:سلیمه آریایي
