رسنۍ وایي چې د اوکراین پر پلازمېنې کېیف د روسیې د بېپیلوټه الوتکو په بریدونو کې لږ تر لږه ۳۷ کسان وژل شوي دي.
د رویټرز د راپور له مخې، دغه بریدونه تېره شپه د «مایلا» سیمې پر یوه ګودام او د کېیف ښار پر نورو برخو شوي دي.
د اوکراین ولسمشر ولودیمیر زلنسکي د «مایلا» پر یوه ګودام برید تایید کړی او ویلي یې دي چې په دغه برید کې ۲۶ کسان وژل شوي او لسګونه نور ټپیان شوي دي.
د اوکراین د ولسمشر په وینا، برید د اورلګېدنې او دویم ځل چاودنې لامل شوی او د سیمې شاوخوا زېربناوو ته یې هم د پام وړ زیان رسولی دی.
هغه د کورونو او استوګنیزو سیمو ترڅنګ د مهماتو پر لېږدولو نیوکه کړې او ویلي یې دي چې هغه چارواکي به مجازات شي چې په دې برخه کې یې غفلت کړی دی.
زلنسکي همداراز ویلي چې د شپې په اوږدو کې د روسیې بریدونه پر اوکراین روان وو او د اودیسې، دنیپرو، کېیف، زاپوریژیا، سومي، خرسون، خارکیف، میکولایف، دونیڅک او چرنیهیف سیمې په نښه شوې دي.
رویټرز راپور ورکړی چې د اوکراین د پلازمېنې په نورو برخو د روسیې په بریدونو کې هم یو شمېر کسان وژل شوي، چې په وژل شویو کې یوه ۱۴ کلنه نجلۍ او یوه ۱۲ کلنه نجلۍ هم شاملې دي.
د دغه رسنۍ د راپور له مخې، روسیې د پرلهپسې درېیمې شپې لپاره د اوکراین پلازمېنه کېیف د ګڼو بېپیلوټه الوتکو په بریدونو کې په نښه کړې او داسې ښکاري چې پر دغه ښار یې د بریدونو نوی کمپاین پیل کړی دی.
لیکواله:سلیمه آریایي
