د طالبانو د کورنیو چارو وزیر سراجالدین حقاني وایي، طالبان کابل ته «فاتحانه» ننوتلي او له امریکا سره د دوحې تړون د هغه په وینا، د «اشغالګرو ځواکونو» لپاره د وتلو زمینه برابره کړې وه.
حقاني دا څرګندونې د طالبانو د بیا واکمنېدو د پنځمې کلیزې په مناسبت په یوه ویډیويي پیغام کې کړې دي. هغه وویل، طالبان د «عظیمو قربانیو» په پایله کې کابل ته ورسېدل او د دوحې په تړون کې له امریکا سره توافق ته ورسېدل.
نوموړي ادعا وکړه چې طالبان کابل ته د «عفوې له لښکرو» سره ننوتلي او تر اوسه یې له چا سره د تېرو کړنو حساب نه دی کړی. دا په داسې حال کې ده چې د پخواني جمهوري نظام یو شمېر نظامیان او دولتي کارکوونکي د طالبانو له واکمنېدو وروسته د نیولو، شکنجې او وژنو په اړه شکایتونه کړي دي.
حقاني همداراز د افغانستان اوسنی امنیتي وضعیت د طالبانو د امنیتي ځواکونو پایله وبلله او ویې ویل چې دغه ډله به اجازه ورنه کړي چې افغانستان یو ځل بیا د بهرنیو ځواکونو د حضور یا امنیتي ستونزو شاهد شي.
د طالبانو د کورنیو چارو وزیر وویل چې دوی له نړیوالو سره پر تعامل بوخت دي او د هېواد د موجودو ننګونو لپاره د حل لارو په لټه کې دي. هغه په ورته وخت کې پر هغو کړیو نیوکه وکړه چې د ده په وینا، له بهرنیو هېوادونو څخه په افغانستان کې د ګډوډۍ د رامنځته کولو هڅې کوي.
حقاني خبرداری ورکړ چې که څوک پر افغانستان د برید هڅه وکړي، باید د تېرو یرغلګرو له برخلیک څخه عبرت واخلي.
نوموړي د افغانستان د ستونزو د حل لپاره پر خبرو او جرګو ټینګار وکړ او ویې ویل چې افغانان خپل اختلافات د «خبرو اترو او مرکو» له لارې حلوي.
د حقاني څرګندونې داسې مهال کېږي چې د طالبانو پر ضد د یو شمېر وسلهوالو مخالفو جبهو د فعالیتونو د زیاتېدو ادعاوې کېږي. طالبان پر پاکستان تور لګوي چې د دوی مخالفینو ته وسلې او پناه ځایونه ورکوي؛ اسلاماباد بیا دا تورونه رد کړي دي.
بلخوا، طالبان له نړیوالې ټولنې سره د پراخو سیاسي اړیکو له نشتوالي سره مخ دي. د ښځو پر کار، د نجونو پر زدهکړو، د بیان پر ازادۍ او نورو مدني حقونو د طالبانو محدودیتونه لا هم د نړیوالو د نیوکو له مهمو موضوعاتو څخه دي.
لیکوال:سعید سمیر
