په خوست ولایت کې ځايي سرچینې وایي چې ټولنیز فعال احسان سعادت څلور ورځې وړاندې د طالبانو د استخباراتو له خوا په خوست ښار کې نیول شوی دی.
یوې ځايي سرچینې ویلي چې احسان سعادت د «پښتون ژغورنې غورځنګ» له ملاتړو څخه دی؛ هغه غورځنګ چې د ډیورنډ کرښې هاخوا د پښتنو د ملاتړ لپاره فعالیت کوي.
د دغې سرچینې په وینا، تر اوسه د احسان سعادت د نیولو لامل نه دی څرګند شوی، او د طالبانو استخباراتو هم د هغه کورنۍ ته د نیولو د علت په اړه هېڅ وضاحت نه دی ورکړی.
سرچینې زیاتوي چې احسان سعادت تر دې وړاندې هم دوه ځله د طالبانو د استخباراتو له خوا نیول شوی و.
د سرچینو په وینا، احسان سعادت د خوست ولایت د مرکز متون ښار کې د انګلیسي ژبې په یوه ښوونیز مرکز کې فعالیت درلود.
طالبانو تر دې وړاندې هم د یو شمېر کسانو د نیولو له امله، پرته له دې چې د هغوی د نیولو دلیل روښانه کړي، له نیوکو سره مخ شوي دي. ځینې سرچینې وایي چې یو شمېر نیول شوي کسان د اوږدې مودې لپاره په بند کې پاتې کېږي.
لیکواله:سلیمه آریایي
