سیمهییزو سرچینو، د شنبې په ورځ د زمري ۱۰مه، د بدخشان ولایت په زېباک ولسوالۍ کې د طالبانو او د دغې ډلې د مخالفانو ترمنځ د نښتو د بیا پیلېدو خبر ورکړی. همدارنګه، په هغه ویډیو کې چې افغانستان انټرنشنل ته رسېدلې، د زېباک ولسوالۍ پر فضا د یوې چورلکې الوتنه لیدل کېږي.
د یوې سرچینې په وینا، د جمعې په ماښام د طالبانو مخالفانو د دغې ډلې د ځواکونو پر یوه کاروان، چې د جګړې لومړۍ کرښې ته روان و، د زېباک ولسوالۍ د سنګلیچ په کلي کې کمین نیولی و. سرچینې ویلي چې په دغه برید کې مرګژوبله اوښتې ده، خو د تلفاتو د شمېر په اړه یې جزیات نه دي ورکړي.
د سیمهییزو سرچینو د معلوماتو له مخې، د تېرې اوونۍ په ترڅ کې د جګړې لومړۍ کرښه د جهیل توپخانې سیمې شاوخوا وه او په وروستیو ورځو کې هم د همدې محور په اوږدو کې د جګړو د دوام راپورونه خپاره شوي وو.
د دې خبر تر خپرېدو پورې، طالبانو او د دوی مخالفو ډلو د تازه نښتو او مطرح شویو ادعاوو په اړه کوم غبرګون نه دی ښودلی. همدارنګه، د جګړې د پراخوالي او احتمالي تلفاتو په اړه نور جزیات لا تر اوسه نه دي ترلاسه شوي.
لیکواله:سلیمه آریایي
