د بغلان ولایت له نهرین او خوست ولسوالیو څخه سرچینې وايي، طالبانو د پنجشنبې په شپه د عملیاتو پر مهال د «شمس خرابات» او «بابه» په ګډون څلور سیمهییز مخالف قومندانان وژلي دي.
د سرچینو په وینا، دغه عملیات د نهرین ولسوالۍ د چهارسايي او د خوست ولسوالۍ د فرغامبول درې په سیمو کې ترسره شوي دي.
طالبپلوه حسابونو هم پر اېکس د یادو عملیاتو او وژل شویو کسانو انځورونه خپاره کړي او هغوی یې «باغیان، شر او فساد» بللي دي. په دغو پوسټونو کې ادعا شوې چې څلور مخالف وسلهوال د عملیاتو پر مهال وژل شوي دي.
د ورکړل شویو معلوماتو له مخې، شمس خرابات د سیمې له مهمو وسلهوالو قومندانانو څخه و او له قومندان بابه سره یوځای یې د چهارسايي په سیمه کې فعالیت درلود.
طالبانو تر اوسه په رسمي ډول د دغو عملیاتو او وژل شویو کسانو په اړه جزئیات نه دي خپاره کړي. خو د طالبانو پلویانو ادعا کړې چې وژل شویو کسانو په سیمه کې «تخریبي فعالیتونه» کول.
دا پېښه داسې مهال کېږي چې د طالبانو له بیا واکمنېدو وروسته د پخوانیو امنیتي ځواکونو، وسلهوالو مخالفینو او د طالبانو د مخالفینو د نیولو، شکنجې او وژلو په اړه د بشري حقونو د بنسټونو او د ملګرو ملتونو له لوري ګڼ راپورونه او اندېښنې خپرې شوي دي.
د سرچینو دا ادعاوې تر اوسه په خپلواکه توګه نه دي تایید شوي.
لیکوال:سعید سمیر
