د کابل د تمدن ټلوېزیون د مرکزي دفتر ته د طالبانو د ځواکونو له ننوتلو او د دې شبکې د خپرونو له درولو یوه ورځ وروسته، د تمدن ټلوېزیون مسؤلینو اعلان وکړ چې «نامعلوم کسان» د دې رسنۍ تجهیزات، وسایل او شتمنۍ انتقالوي.
دې شبکې د یادو کسانو د هویت په اړه نور جزئیات نه دي ورکړي.
تمدن ټلوېزیون د چهارشنبې په ورځ، د چنګاښ په ۳مه، په یوه اعلامیه کې ویلي چې د دې رسنۍ په شتمنیو او داراییو کې هر ډول تصرف، انتقال، ایستل یا لاسوهنه قانوني بنسټ نه لري او غیرقانوني تصرف ګڼل کېدای شي.
په اعلامیه کې ټینګار شوی چې په یادې ودانۍ کې شخصي استوګنیز واحدونه هم شته او د اوسېدونکو شتمنۍ او دارايي باید درناوی وشي او له هر ډول زیان او لاسوهنې څخه خوندي وساتل شي.
تمدن ټلوېزیون همدارنګه خبرداری ورکړی چې که د دې رسنۍ شتمنیو یا په ودانۍ کې موجودو شخصي داراییو ته هر ډول زیان، وراني، ورکېدل، غیرقانوني انتقال یا تاوان واوړي، قانوني او حقوقي مسؤلیت به یې د طالبانو د کورنیو چارو وزارت او نورو اړوندو ادارو پر غاړه وي.
دې شبکې پرون هم اعلان کړی و چې د طالبانو ځواکونو په کابل کې د تمدن ټلوېزیون مرکزي دفتر ته له ننوتلو وروسته د دې شبکې خپرونې درولې دي. د دې رسنۍ د یوه مسؤل په وینا، د طالبانو د عدلیې وزارت اړوند امنیتي ځواکونو شاوخوا د غرمې په ۱۲ بجو دفتر ته ننوتلي، د شبکې فعالیت یې درولی او له کارکوونکو سره یې سپکاوی او تحقیر کوونکی چلند کړی دی.
په همدې حال کې، د افغانستان د خبریالانو مرکز د طالبانو د عدلیې وزارت د ځواکونو له خوا د تمدن ټلوېزیون دفتر ته ننوتل او د دې رسنۍ د فعالیت درول غندلي دي. دې بنسټ ویلي چې دا ډول اقدامات د خپلواکو رسنیو پر وړاندې د محدودیتونو د دوام، د اقلیتونو د غږ د محدودولو او په هېواد کې د بیان د آزادۍ د کمزوري کېدو څرګندونه کوي.
تمدن ټلوېزیون په ۱۳۸۵ کال کې د محمدآصف محسني، د افغانستان د اسلامي حرکت ګوند د پخواني مشر، له خوا په کابل کې تاسیس شوی و. دې شبکې د خبرونو تر څنګ، دیني او مذهبي پروګرامونه او همدارنګه اسلامي محتوا لرونکي فلمونه او سریالونه خپلو لیدونکو ته خپرول.
لیکواله:سلیمه آریایي
