د هسپانیې په سوېل کې د المریا په سیمه کې د پراخې ځنګلي اورلګېدنې له امله لږ تر لږه ۱۲ کسان مړه شوي او ۱۵۰ اوروژونکي لا هم د اور د مهارولو لپاره په عملیاتو بوخت دي.
رویټرز خبري اژانس د جمعې په ورځ، د جولای په ۱۰مه، راپور ورکړی چې د اندلس سیمې د بېړنیو حالاتو د مدیریت ادارې چارواکو دا پېښه د دې سیمې په تاریخ کې تر ټولو مرګونې ځنګلي اورلګېدنه بللې ده. تر دې مخکې د مړو شمېر ۶ تنه اعلان شوی و، خو وروسته دا شمېر ۱۲ تنو ته لوړ شو.
د اندلس د روغتیا او بېړنیو حالاتو وزیر، انتونیو سانز، دا پېښه د سیمې په تاریخ کې «تر ټولو ویجاړوونکې اورلګېدنه» وبلله او هغه یې «بېسارې تراژیدي» وبلله. د هغه په وینا، د ژغورنې او مرستې ځواکونه په بشپړ توان سره د اور د مهارولو او د زیانونو د کمولو لپاره کار کوي.
د اندلس د سیمهییز حکومت مشر، خوانما مورېنو، د قربانیانو له کورنیو سره د خواخوږۍ څرګندونه وکړه او ویې ویل چې ټولې اړوندې ادارې د اور د مهارولو، زیانمنو کسانو ته د مرستې رسولو او د بېړني حالت د مدیریت لپاره تیار شوي دي.
دا اورلګېدنه په داسې حال کې رامنځته شوې چې د تودوخې له وخته مخکې راغلې څپه او وچکالۍ د لوېدیزې اروپا په پراخو سیمو کې د ځنګلي اورونو د رامنځته کېدو خطر زیات کړی دی. سیمهییزو چارواکو د دغو شرایطو د دوام او د اور د لا پراخېدو په اړه خبرداری ورکړی دی.
د هوا پېژندنې نړیوال سازمان هم تر دې مخکې ویلي وو چې اروپا د نړۍ د اوسط په پرتله له دوه برابره زیات سرعت سره د تودوخې له زیاتوالي سره مخ ده. دغه سازمان خبرداری ورکړی چې د اقلیمي بدلونونو له امله به په اروپا کې د اوږدمهالو تودوخې څپو او پراخو ځنګلي اورونو پېښې لا زیاتې شي.
لیکواله:سلیمه آریايي
