عصمتالله مجددي، د جمهوري نظام د ملي امنیت شورا د دفتر پخوانی سلاکار او د افغانستان د پخواني ولسمشر صبغتالله مجددي زوی، په دې وروستیو کې د طالبانو په بلنه کابل ته راستون شوی دی.
هغه د طالبانو د یو شمېر لوړپوړو چارواکو په حضور کې په یوه غونډه کې د پخواني حکومت پر فساد نیوکه وکړه او ویې ویل: «په پخواني حکومت کې موږ په داسې فساد او جنجال کې راګیر وو چې د خلاصون هېڅ لاره یې نه لرله. دا اعتبار تاسو ته درکوو چې ستاسو په راتګ سره غله ورک شول.»
عصمتالله مجددي د طالبانو له مشرانو څخه د خپل بېرته ستنېدو د زمینې د برابرولو له امله مننه وکړه، خو په ورته وخت کې یې د طالبانو د ځینو ځواکونو پر چلند هم نیوکه وکړه. د هغه په وینا، د طالبانو یو شمېر ځواکونو د مجددي کورنۍ پر کور چاپه وهلې چې دې کار د کورنۍ غړي خوابدي کړي دي.
دا څرګندونې په داسې حال کې کېږي چې د مجددي کورنۍ د جمهوري نظام پر مهال د افغانستان له تر ټولو بانفوذه او اغېزناکو سیاسي کورنیو څخه شمېرل کېده او د امریکا او ناټو د شل کلن حضور پر مهال یې د واک په بېلابېلو برخو کې مهم رول درلود.
صبغتالله مجددي د جمهوري نظام د جوړېدو له مهمو اغېزناکو څېرو څخه و. هغه د اساسي قانون د لویې جرګې مشري پر غاړه لرله او یو کال وروسته د هغه وخت ولسمشر حامد کرزي د سولې د ټینګښت د کمیسیون مشر وټاکه. دغه کمیسیون د امریکا او ناټو په ملاتړ فعالیت کاوه او د دودیزو جرګو له لارې یې د ځینو شخړو د هواري هڅې کولې.
هغه همدارنګه د مشرانو جرګې د پنځلسمې دورې رئیس هم پاتې شوی و. که څه هم د عمر د زیاتوالي له امله یې په غونډو کې ګډون محدود شوی و، خو تر ۱۳۹۰ لمریز کال پورې په همدې دنده پاتې شو او د دې مقام له صلاحیتونو او امتیازونو څخه برخمن و.
د صبغتالله مجددي له مهمو مسؤلیتونو څخه یو هم په ۱۳۹۲ لمریز کال کې د افغانستان او امریکا ترمنځ د امنیتي او ستراتیژیک تړون په اړه د مشورتي لویې جرګې مشري وه. دا جرګه د شاوخوا ۲۵۰۰ استازو په ګډون جوړه شوې وه څو د دې تړون د لاسلیک په اړه پرېکړه وکړي.
مجددي د دغې جرګې په پای کې په څرګنده توګه د امنیتي تړون د لاسلیک ملاتړ وکړ او په دې برخه کې یې د هغه وخت له ولسمشر حامد کرزي سره د نظر اختلاف درلود. هغه اعلان کړی و چې که دا تړون لاسلیک نه شي، افغانستان به پرېږدي.
صبغتالله مجددي له امریکا متحده ایالاتو سره د امنیتي تړون له اصلي ملاتړو څخه و او باور یې درلود چې دغه تړون به د امنیت په ټینګښت او د طالبانو پر وړاندې په مبارزه کې مرسته وکړي. په مقابل کې، حامد کرزي ټینګار کاوه چې په افغانستان کې د ناامنۍ دوام، په داسې حال کې چې امریکايي ځواکونه په خوندي اډو کې حضور لري، د منلو وړ نه دی.
په همدې حال کې، د افغانستان یو پخوانی امنیتي چارواکی ادعا کوي چې امریکا او ناټو په منظم ډول له صبغتالله مجددي څخه مالي ملاتړ کاوه. د هغه په وینا، د مجددي مذهبي مقام او سیاسي نفوذ، په ځانګړي ډول د حکومت د لوړپوړو چارواکو ترمنځ، لامل شوی و چې د نړیوالو ملاتړو لپاره د هغه رضایت ځانګړی اهمیت ولري.
دغه پخوانی امنیتي چارواکی همدارنګه ادعا کوي چې صبغتالله مجددي د حامد کرزي له مالي ملاتړ څخه هم برخمن و. کرزی د مجددي په مشرۍ د افغانستان د نجات ملي ګوند غړی و؛ هغه ګوند چې د مجاهدینو له اووه ګونو ګوندونو څخه شمېرل کېده او د پاکستان په پېښور کې رامنځته شوی و.
د شخصي مسؤلیتونو ترڅنګ، د مجددي کورنۍ غړو هم د جمهوري نظام په حکومتي جوړښت کې فعال حضور درلود. د دې کورنۍ یو شمېر نږدې خپلوان د وزارتونو، ولایتونو او نورو دولتي دندو مسؤلیتونه پر غاړه لرل. عصمتالله مجددي هم په امنیتي برخو کې دندې ترسره کړې وې او داسې راپورونه هم خپاره شوي وو چې نوموړي په دولتي ادارو کې د ځینو کسانو د معرفۍ او ګومارنې په بهیر کې رول درلود.
د صبغتالله مجددي له مړینې وروسته، ذبیحالله مجددي د هغه د ځایناستي په توګه د ګوند مشري او د کورنۍ د سیاسي او تشکیلاتي دریځ یوه برخه پر غاړه واخیسته.
د عصمتالله مجددي وروستۍ څرګندونې چې پخوانی حکومت یې پر فساد تورن کړی، په داسې حال کې مطرح کېږي چې د هغه کورنۍ د کلونو لپاره د واک په لوړو کچو کې حضور درلود او د هېواد په سیاسي او اجرایي بهیرونو کې یې مهم رول لوبولی و.
همدارنګه، صبغتالله مجددي د خپل سیاسي فعالیت پر مهال د طالبانو له مخالفانو څخه شمېرل کېده او له امریکا سره یې د افغانستان د امنیتي همکاریو د دوام ملاتړ کاوه. له همدې امله، د پخواني حکومت او طالبانو په اړه د عصمتالله مجددي وروستي دریځونه، د مجددي کورنۍ د سیاسي مخینې په پام کې نیولو سره، د څارونکو او شنونکو ځانګړې پاملرنه ځانته اړولې ده.
لیکواله:سلیمه آریایي
