نقیبالله علمیار، د سرپل ولایت د طالبانو د امنیه قومندانۍ ویاند وايي، د دې ډلې ځواکونو هغه کس نیولی دی چې په کوهستاناتو ولسوالۍ کې د خپلې میرمنې او د میرمنې مور د وژنې په تور تورن دی.
د طالبانو د دې چارواکي په وینا، تورن کس تېره شپه وروسته له هغه له ځایه تښتېدلی و چې خپلې میرمنې او د میرمنې مور یې د ټوپک په وسیله ووژلې. هغه زیاته کړه چې یاد کس د «دقیقو څېړنو او وروسته د امنیتي ځواکونو د له چټکو اقداماتو» نیول شوی دی.
د طالبانو د امنیه قومندانۍ ویاند تر اوسه د تورن کس د هویت او د دې پېښې د انګېزې په اړه نور جزئیات نه دي خپاره کړي.
د راپورونو له مخې، وروسته د طالبانو تر بیا واکمنېدو، په یو شمېر ولایتونو کې جرمونه زیات شوي دي.
راپورونه ښيي چې د دې پېښو لویه برخه د کورنیو شخړو، جبري وادونو او د میراث او ځمکې پر سر د اختلافاتو له امله رامنځته کېږي. په ډېرو پېښو کې ښځې او ماشومان د دې پېښو قرباني کېږي.
لیکواله:سلیمه آریایي
