طالبانو له درې ورځني ځنډ وروسته د افغانستان د ملي مقاومت جبهې د یوه قوماندان، حسیب پنجشیري، جسد په کابل کې د هغه خپلوانو ته سپارلی دی. سرچینې وايي، طالبانو د هغه د جسد د سپارلو لپاره دوه شرطونه ایښي وو؛ د جنازې په مراسمو کې باید شعارونه ورنه کړل شي او د مراسمو پر مهال باید عکس یا ویډیو وانخیستل شي.
طالبانو د یکشنبې په ورځ، د وږي په لومړۍ نېټه، د حسیب پنجشیري جسد له چاریکار څخه کابل ته انتقال کړ. د سرچینو په وینا، ټاکل شوې چې د هغه جسد د خښولو لپاره پنجشېر ته ولېږدول شي.
حسیب پنجشیري، چې په «حسیب قوای مرکز» مشهور و، د افغانستان د ملي مقاومت جبهې له قوماندانانو څخه و. هغه د پنجشنبې په ورځ، د زمري په ۲۹مه، په شمالي سالنګ کې له طالبانو سره د نښتې پر مهال ووژل شو.
تر دې وړاندې د سره صلیب نړیوالې کمېټې هم له طالبانو څخه د حسیب پنجشیري د جسد د ترلاسه کولو لپاره هڅې کړې وې. خو د هغه د جسد د سپارلو بهیر درې ورځې وخت ونیو.
د دې قوماندان له وژل کېدو وروسته، یو شمېر سیاسي څېرو او د افغانستان پخوانیو چارواکو پر دې پېښې غبرګون وښود او حسیب پنجشیري یې له طالبانو سره د مبارزې له اغېزناکو قوماندانانو څخه وباله.
د حسیب پنجشیري وژل کېدو د افغانستان د خلکو او د ټولنیزو شبکو د کاروونکو ترمنځ هم پراخ انعکاس درلود. د هغه د مړینې په اړه، په ځانګړي ډول د هغه له جسد سره د چلند په اړه، غبرګونونه لا هم په ټولنیزو شبکو کې دوام لري.
د هغه له وژل کېدو وروسته په ټولنیزو شبکو کې یوه ویډیو خپره شوه چې پکې د طالبانو یو جنګیالی د حسیب پنجشیري د جسد ویښتان راکاږي. د دې ویډیو خپرېدو پراخ غبرګونونه راوپارول.
د افغانستان ملي مقاومت جبهې د دې ویډیو له خپرېدو وروسته له ملګرو ملتونو وغوښتل چې د هغه څه په اړه څېړنه وکړي چې دوی یې د دغه قوماندان له جسد سره سپکاوی بولي. تر اوسه د دې غوښتنې د احتمالي پایلې په اړه نور معلومات نه دي خپاره شوي.
لیکواله:سلیمه آریایي
